22 ივლისის ღამეს ვერაზე მომხდარ სროლაში დაჭრილი 2 ახალგაზრდის ჯანმრთელობის მდგომარეობის შესახებ კლინიკა "ჰელსიკორეს" აღმასრულებელი დირექტორია შმაგი ჭიოკაძე ამბობს, რომ პაციენტები კარგად გრძნობენ თავს და ისინი პალატაში გადაიყვანეს.

"22 ივლისს, დაახლოებით 22:00 საათზე, კლინიკაში შემოყვანილ იქნა ორი ახალგაზრდა ბიჭი, 17-18 წლისანი, რომელთაც აღენიშნებოდათ ჭრილობა მარცხენა მხრისა და მარცხენა მტევნის არეში. ჩატარდა ოპერაციული მკურნალობა. პაციენტები, დღეის მდგომარეობას, თავად კარგად გრძნობენ, გადაყვანილ იქნენ პალატაში. სარეაბილიტაციო მკურნალობამ წარმატებით ჩაიარა. აქტიურები არიან, დღეის მდგომარეობით გაცილებით უკეთ არიან და სავარაუდოდ ხვალ-ზეგ გავწერთ", — განაცხადა "ტვ პირველთან" საუბრისას კლინიკა "ჰელსიკორეს" აღმასრულებელმა დირექტორმა შმაგი ჭიოკაძემ.

ვერაზე მომხდარი სროლის შედეგად 4 ადამიანი დაიჭრა, ერთი მათგანი კლინიკაში შეყვანის შემდეგ გარდაიცვალა, 2 ახალგაზრდა ამ დრომდე "ჰელსიკორეში" რჩება, მეოთხე დაჭრილს, ქალს, თხემის არეში ჰქონდა მსუბუქი დაზიანება. ის 22 ივლისს ღამითვე გაწერეს კლინიკიდან.