ყვავილების, თევზეულის, ხილის და მინერალური წყლის შემდეგ, რუსეთი სომხეთიდან რძის პროდუქტების იმპორტსაც ზღუდავს. როგორც გამოცემა Meduza წერს, რუსეთის ფედერალური ვეტერინარული და ფიტოსანიტარული ზედამხედველობის სამსახური (როსსელხოზნადზორი) 2026 წლის 27 ივლისიდან სომხეთიდან რძის პროდუქტების იმპორტზე შეზღუდვებს აწესებს.

უწყების განცხადებით, გადაწყვეტილება 14–21 ივლისს ჩატარებული ინსპექტირების შედეგებს ეფუძნება, რომლის დროსაც არაერთი დარღვევა გამოვლინდა. როსსელხოზნადზორის მტკიცებით, მათ შორის დადგინდა, რომ რუსეთში ექსპორტისთვის განკუთვნილი რძის პროდუქტების წარმოებაში გამოიყენებოდა ინფიცირებული პირუტყვისგან მიღებული რძე.

რუსეთმა სომხეთიდან სხვადასხვა პროდუქციის იმპორტის ეტაპობრივი აკრძალვა მაისის ბოლოსა და ივნისის დასაწყისში დაიწყო. შეზღუდვები შეეხო, მათ შორის, ყვავილებს, მინერალურ წყალს, ბოსტნეულსა და ხილს. რუსული მხარე ყველა შემთხვევაში გადაწყვეტილებას გამოვლენილი დარღვევებით ხსნიდა.

აკრძალვები დაწესდა იმ პერიოდში, როდესაც სომხეთი 7 ივნისის საპარლამენტო არჩევნებისთვის ემზადებოდა, ასევე იმ ფონზე, როცა ქვეყანა ევროკავშირთან დაახლოებას ცდილობს. რამდენიმე დღეში, მას შემდეგ, რაც არჩევნებში პრემიერმინისტრ ნიკოლ ფაშინიანის ხელმძღვანელობით მოქმედმა მმართველმა პარტიამ გაიმარჯვა, რუსეთმა სომხეთიდან მთელი საკარანტინო კონტროლს დაქვემდებარებული პროდუქციის იმპორტიც აკრძალა.