ტრევის სკოტი კრისტოფერ ნოლანის ახალ ფილმში, ოდისეაში, სამსახიობო დებიუტს ასრულებს. რეპერისთვის ეს სრულმეტრაჟიან ფილმში პირველი სამსახიობო გამოცდილებაა.

ტრევის სკოტმა ჯიმი ფელონის შოუში გაიხსენა, როგორ დაურეკა კრისტოფერ ნოლანმა და მოულოდნელად ფილმში მონაწილეობა შესთავაზა. მისი თქმით, როდესაც ტელეფონზე სახელი "კრისი" დაინახა, იფიქრა, რომ ნოლანს, შესაძლოა, მის კონცერტზე დასწრება სურდა.

"ტელეფონს ვუპასუხე და მკითხა, მაინტერესებდა თუ არა ფილმში თამაში. ვიფიქრე, რომ შესაძლოა სხვის პროექტზე მელაპარაკებოდა და არა საკუთარ ფილმზე. ვუთხარი: მოიცადეთ, ხომ იცით, რომ მუსიკოსი ვარ? შემდეგ კი დეტალურად ამიხსნა, რატომ სურდა ფილმში ჩემი მონაწილეობა", — იხსენებს ტრევის სკოტი.

კრისტოფერ ნოლანმა რეპერს ჯერ ფილმში მონაწილეობა შესთავაზა და მხოლოდ მოგვიანებით სთხოვა, ოდისეისთვის სიმღერა When I’m Home შეექმნა.

ტრევის სკოტი კრისტოფერ ნოლანის The Odyssey-ში.

ფოტო: Universal Pictures

ტრევის სკოტის თქმით, ნოლანი მისთვის არა მხოლოდ შთაგონების წყარო, არამედ ერთგვარი მენტორიცაა, ამიტომ შეთავაზებას დასთანხმდა. მიუხედავად ამისა, გადაღებების დაწყებისას ძალიან ნერვიულობდა, რადგან მანამდე მხოლოდ მუსიკალური კლიპების გადაღების გამოცდილება ჰქონდა.

მუსიკოსს თავდაპირველად ეგონა, რომ მხოლოდ ერთ პატარა სცენაში გამოჩნდებოდა, თუმცა მოგვიანებით გაიგო, რომ ენ ჰეთეუეისთან, ტომ ჰოლანდთან და რობერტ პატინსონთან ერთად მოუწევდა თამაში. ტრევის სკოტი თავიდან გამოცდილ მსახიობებთან მუშაობამ დააბნია, თუმცა გადამღები ჯგუფის დახმარებით თავი მალევე კომფორტულად იგრძნო.