2026 წლის საბავშვო ევროვიზიის სიმღერის კონკურსამდე ზუსტად სამი თვე გვაშორებს. სწორედ დღეს გახდა ცნობილი, რომ მუსიკალურ ფესტივალზე წელს შარშანდელზე ორით ნაკლები, 16 ქვეყანა მიიღებს მონაწილეობას; კონკურსს აზერბაიჯანი და ხორვატია გამოაკლდნენ. მონაწილეების საბოლოო სია კი ასე გამოიყურება:

  1. ალბანეთი
  2. სომხეთი
  3. კვიპროსი
  4. საფრანგეთი
  5. საქართველო
  6. ირლანდია
  7. იტალია
  8. მალტა
  9. მონტენეგრო
  10. ნიდერლანდები
  11. ჩრდილოეთ მაკედონია
  12. პოლონეთი
  13. პორტუგალია
  14. სან-მარინო
  15. ესპანეთი
  16. უკრაინა

აღსანიშნავია, რომ ევროვიზია ჯუნიორზე მონაწილეობას აგრძელებს სამი ქვეყანა — ირლანდია, ნიდერლანდები და ესპანეთი — რომლებმაც "დიდების" ევროფესტივალს წელს ბოიკოტი გამოუცხადეს ისრაელის კონკურსზე დაშვების გამო.

2026 წლის საბავშვო ევროფესტივალს მალტა უმასპინძლებს. კუნძულოვან სახელმწიფოში კონკურსი უკვე მესამედ ჩატარდება. რიგით 24-ე ევროვიზია ჯუნიორი 24 ოქტომბერს გაიმართება. აღსანიშნავია ისიც, რომ საბავშვო ევროვიზია ასე ადრე არასდროს ჩატარებულა: ფინალის თარიღი ყოველთვის ნოემბრის მეორე ნახევარში ან დეკემბერში იყო.

შეგახსენებთ, რომ გასულ წელს საბავშვო ევროვიზია თბილისში გაიმართა, სადაც საქართველოს რეკორდთან გათანაბრებული მეოთხე გამარჯვება საფრანგეთმა მოიპოვა. კონკურსის წესების თანახმად, პირველი სწორედ საფრანგეთს შესთავაზეს ფესტივალის მასპინძლობა, მაგრამ ქვეყანამ ფინანსური მიზეზების გამო უარი თქვა.

წლევანდელ კონკურსზე საქართველოს 9 წლის დავით ლომიძე წარადგენს, რომელიც პირველი არხის პროექტ რანინას გამარჯვებული გახდა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...