პროკურატურამ იუმორისტ ონისე ოქრიაშვილზე თავდამსხმელს ბრალი წარუდგინა.

უწყება სასამართლოში თავდამსხმელისთვის 5000 ლარის ოდენობით გირაოს შეფარდებას მოითხოვს. პირს ბრალდება საქართველოს სისხლის სამართლის კოდექსის 126 -ე მუხლის პირველი ნაწილით (ძალადობა) წარედგინა.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 2026 წლის 22 ივლისს, ღამის საათებში, თბილისში, ქართველი მწერლის ნოდარ დუმბაძის შეურაცხყოფის გამო, ბრალდებული ფიზიკურად გაუსწორდა ონისე ოქრიაშვილს, რომელსაც ხელი რამდენჯერმე დაარტყა თავის და სხეულის სხვადასხვა არეში, რის გამოც დაზარალებულმა ფიზიკური ტკივილი განიცადა.

სამართალდამცავებმა ბრალდებული მომხდარი ფაქტიდან რამდენიმე საათში დააკავეს. მას ბრალდება საქართველოს სისხლის სამართლის კოდექსის 126-ე მუხლის პირველი ნაწილით (ძალადობა) წარედგინა.

პროკურატურა ბრალდებულისთვის აღკვეთის ღონისძიების სახით პატიმრობის უზრუნველყოფით 5000 ლარის ოდენობით გირაოს შეფარდების შუამდგომლობით სასამართლოს კანონით დადგენილ ვადაში მიმართავს," — წერს უწყება.

22 ივლისის ღამეს იუმორისტ ონისე ოქრიაშვილს საკუთარ სახლთან 3 უცნობი პირი ფიზიკურად გაუსწორდა. მალევე შინაგან საქმეთა სამინისტრომ გაავრცელა ინფორმაცია, რომ მომხდარზე ერთი პირი პოლიციის განყოფილებაში გამოცხადდა და აღიარა დანაშაული.

თავდასხმას წინ უძღოდა პროპაგანდისტული მედიების კრიტიკა ონისე ოქრიაშვილის მიერ ნოდარ დუმბაძეზე ხუმრობის გამო. საქმეზე ბრალდებულმა დაკავების იზოლატორიდან წერილი გაავრცელა, სადაც წერს, რომ "არასდროს ყოფილა ძალადობის მომხრე", მაგრამ ჩადენილ დანაშაულზე საუბრისას განაცხადა, რომ "ვერ გადარჩება ქვეყანა, სადაც ეკლესიის, ნოდარ დუმბაძის, დავით აღმაშენებლის თუ რუსთაველის გინება "მოსულა", რადგან ხუმრობაა, არ შეიძლება, ჩვენი შვილები მათი იდეოლოგიით გაიზარდონ".

ამ წერილის გამოქვეყნებიდან მეორე დღეს, 24 ივლისს, ქართული ოცნების დეპუტატი დიტო სამხარაძე სოციალურ ქსელში ინიციატივით გამოვიდა, რომ "როგორც დეპუტატი, მზად არის თავდებში ჩაუდგეს" თავდამსხმელს.