Verizon აპირებს, რომ Tumblr გაყიდოს და მისი შეძენის მსურველი უკვე გამოჩნდა. PornHub-ის ვიცე-პრეზიდენტმა კორეი პრაისმა BuzzFeed-ს იმეილით აცნობა, რომ ბლოგერების ერთ-ერთი ყველაზე პოპულარული საიტის ყიდვა სურს.

თუმცა ეს ყველაფერი არაა. პორნჰაბი თამბლერის შეძენის შემთხვევაში საიტზე შიშველი კონტენტის დაბრუნებას გეგმავს. აღნიშნული შეზუღუდვა სოციალურ ქსელზე გასული წლის 17 დეკემბერს ამოქმედდა.

თამბლერზე აკრძალვის შემოღება უამრავმა მომხმარებელმა გააპროტესტა, რადგან საიტი მარგინალიზირებული სექსუალური ჯგუფების თავშეყრის ადგილიც იყო.

"თამბლერერებო, პორნჰაბი გაშლილი ხელებით გელოდებათ. შემოუერთდით ჩვენს მილიონობით მომხმარებელს, თქვენი მოთხოვნებზე მოირგეთ მთავარი გვერდი, შექმენით ფლეილისთები, გამოიყენეთ გიფები. თუ ვიდეოკონტენტის მფლობელები ხართ, ატვირთეთ თქვენი ვიდეოები, ფოტოები, ტექსტები და გაასაჯაროეთ ჩვენს აუდიტორიასთან და ასევე, გამოიმუშავეთ ფული თქვენი მასალით", — სთავაზობდა პორნჰაბი თამბლერის მომხმარებლებს დეკემბერში.

კორეი პრაისის სიტყვებით, თამბლერი კარგი ადგილი იყო იმ ადამიანებისთვის, ვისაც საკუთარი სექსუალობის გამოხატვა ან გემოვნების გამორკვევა სურდა.

საიტზე ქვიარ ჯგუფები საკუთარ ინტერესებს თავისუფლად ასაჯაროებდნენ, მათი გემოვნება მეინსტრიმულ პორნოგრაფიაში ხშირად უგულებელყოფილია.