მოლების დაკეტვასთან ერთად, მომხმარებლისთვის უფრო კომფორტული პლატფორმა ონლაინ-შოპინგი ხდება. ამას Credite Suisse-ის განცხადებაც მოწმობს, რომელიც ამერიკაში მომდევნო ხუთ წელიწადში სავაჭრო ცენტრთა 20-25%-ის დაკეტვას ვარაუდობს.

ონლაინ-შოპინგის გამოცდილება, რა თქმა უნდა, გაცილებით თანამედროვე და კომფორტულია, თავისი ხიბლიც აქვს, თუმცა დაკეტილი მოლები, სავაჭრო ცენტრები ნოსტალგიას აღძრავს.

გიფიქრიათ ოდესმე მიტოვებული ადგილების მონახულებაზე? ასეთი ადგილებზე ფიქრისას, ალბათ, პირველ რიგში, დაცლილი ქალაქები და სოფლები, მიტოვებული სახლები, ბუნებრივი კატაკლიზმების შედეგად განადგურებული წერტილები გახსენდებათ და სევდა გიპყრობთ, თუმცა ამერიკელი ფოტოგრაფის ობიექტივში მიტოვებული სავაჭრო ცენტრები აღმოჩნდა.

დენ ბელისთვის ყველაფერი მისი ბავშვობის დროინდელი სავაჭრო ცენტრის გახსენებით დაიწყო. ის დაინტერესდა იმით, თუ რა დაემართა სავაჭრო ცენტრს, რომელშიც თინეიჯერობისას დიდ დროს ატარებდა, როგორ გამოიყურებოდა ის, მას შემდეგ, რაც მუშაობა შეწყვიტა?

"მახსოვს, რომ სავაჭრო ცენტრებში სიარული ჩვენი ყოველდღიურობა იყო. მაშინ არასდროს გვიფიქრია, "იცი რა, მოდი, ფოტოები ხომ არ გადაგვეღო?" ჩემი აზრით, ეს თავში არავის მოსვლია აზრად", - ამბობს დენ ბელი ABC News-სთან საუბრისას.

ფოტო: Dan Bell

ბავშვობის მოგონებების გასახსენებლად, დენმა გადაწყვიტა იმ სავაჭრო ცენტრის შესახებ მოეძიებინა ინფორმაცია, რომელშიც დიდ დროს ატარებდა, თუმცა ვერაფერს მიაგნო.

"გადავწყვიტე ინტერნეტში მომეძიებინა სავაჭრო ცენტრ Jumpers-ის შესახებ ინფორმაცია, მაგრამ ვერც ფოტოებს მივაგენი, ვერც ვიდეოს - საერთოდ არაფერი იყო", - იხსენებს ის.

ამის შემდეგ, გადაწყვიტა, შეექმნა მულტიმედია პროექტი "მკვდარი მოლების სერია", რომელშიც ამერიკის მიტოვებული სავაჭრო ცენტრები გააერთიანა.

"ვფიქრობდი, ისეთი სავაჭრო ცენტრების არქივი შემექმნა, რომლებიც ნელ-ნელა სამუდამოდ იკეტებიან", - ამბობს ფოტოგრაფი. რეალურად, ფოტოები, მართლაც, ნოსტალგიურ ატმოსფეროს ქმნის. ზოგს თავისი ახალგაზრდობის ბედნიერი პერიოდი ახსენდება, ზოგს კი სევდა იპყრობს. თუმცა, ეს არ ეხება მხოლოდ იმ თაობას, რომელიც სწორედ ამ სავაჭრო ცენტრებს მოესწრო. მსგავსი ვინტაჟური გარემო დღევანდელი ახალგაზრდობისთვისაც საინტერესო და მიმზიდველია. აქედან გამომდინარე, გადაღებული კადრები მაყურებლისთვის საკმაოდ ემოციურია.

მკვდარი მოლები

ფოტო: Dan Bell

"მკვდარი მოლები" უკვე დაკეტილი და დაცარიელებული სავაჭრო მოლებია, რომლებიც ერთ დროს სავსე იყვნენ ადამიანებით. დენ ბელმა ამ პროექტის წამოწყებისას მალევე აღმოაჩინა, რომ ამ საკითხში მარტო არ იყო.

სოციალურ მედიაში ამ თემის გარშემო უამრავი ჯგუფი არსებობს, რომლებშიც ადამიანები სავაჭრო ცენტრების მომავალსა და სიცოცხლისუნარიანობას განიხილავენ.

მკვდარი მოლების სერიის ერთ-ერთ სიუჟეტში ფოტოგრაფი ვიდეო-კამერით ფოლადის ერთ-ერთ სკულპტურას იღებს და პირად ისტორიას აზიარებს: "აქ მანამდე ფეხსაცმლის მაღაზია იყო, სწორედ ამ სკულპტურის წინ, სადაც ვმუშაობდი, რადგან მაღაზია ჩემს მეგობარს ეკუთვნოდა. სამუშაო დღეებში ყოველდღე ვუყურებდი ერთსა და იმავე ხედს."

"არ ვიცი, რანაირად ვახერხებდი მოლში მუშაობას, რადგან მაღაზიაში არასდროს არ ვიყავი.", - იცინის დენ ბელი. - "უბრალოდ დავდიოდი და ყველას ვესაუბრებოდი. იმ პერიოდში ყველა უიღბლოები ვიყავით, ვეწეოდით სიგარეტს, ვსვამდით სამუშაო საათებში, კარგ დროს ვატარებდით. თითქოს ყველა ერთმანეთზე ვზრუნავდით. ეს უფრო მარტივს ხდიდა ჩვენს სამუშაოს."

ბურლინგტონის სავაჭრო ცენტრი

ფოტო: Peter Garritano/The New York Times

1996 წელს დენის სამუშაო ადგილი დაიკეტა. მან და მისმა თანამშრომელმა მთელი ღამე იქ გაატარეს, მისეირნობდნენ ცარიელ დერეფნებში, ამ დროს კი გარეთ ქარი ქროდა. ეს გამოცდილება აისახა სწორედ დენის ფოტოგრაფიაში 20 წლის შემდეგ, როდესაც მან ვიდეოებისა და ფოტოების გადაღება დაიწყო.

მისი საყვარელი, უკვე დაკეტილი მოლი მერილენდში მდებარეობს, რომელიც ამჟამად ორ მაღაზიად გაიყო. ერთი ავეჯს, ხოლო მეორე - ბავშვისთვის საჭირო ნივთებს ყიდის.

დენ ბელის მასალა მიტოვებულ მოლებს ნოსტალგიის ელფერს სძენს. მისი პროექტი რომ ძალიან რეზონანსული გახდა, ამას გამოხმაურებებიც მოწმობს. მას სოციალურ მედიაში უამრავი მიმდევარი ჰყავს.

ფოტო: Dan Bell

დენი გაჩერებას არ აპირებს. ის ფიქრობს, რომ აღმოსაჩენი ჯერ კიდევ ბევრია, ხალხის მხარდაჭერა და გამოხმაურებები კი ძალას მატებს.

"ჩემი აზრით, ჩემი ასაკის ხალხი ჩემს ვიდეოებს დროის კაფსულად აღიქვავენ. ამიტომაც მგონია, რომ ჩემი საქმე ჯერჯერობით არ დასრულებულა."