"ვენეციის კომისიის სამართლებრივ რეკომენდაციებს გავითვალისწინებთ, ის რეკომენდაციები, რომლებიც პოლიტიკურ გადაწყვეტილებას უკავშირდება იქნება განხილული პოლიტიკური გადაწყვეტილების მიღების დროს", — ეს განცხადება საპარლამენტო უმრავლესობის თავმჯდომარემ არჩილ თალაკვაძემ საპარლამენტო უმრავლესობის სხდომის დასრულების შემდეგ განაცხადა. სხდომაზე უზენაესის მოსამართლეთა არჩევის კანონპროექტზე ვენეციის კომისიის რეკომენდაციებს განიხილავდნენ.

არჩილ თალაკვაძემ განაცხადა, რომ ქართული ოცნება გაითვალისწინებს რეკომენდაციებს ინტერესთა კონფლიქტისა და საკვალიფიკაციო გამოხდის ამოღების შესახებ. უმრავლესობის ლიდერს არ დაუსახელებია სხვა კონკრეტული რეკომენდაციები, რომელსაც კანონპროექტში ასახავდნენ, თუმცა თქვა, რომ "ფაქტობრივად ყველა სამართლებრივ რეკომენდაციას გაითვალისწინებენ".

ქართული ოცნების დეპუტატმა თქვა, რომ ისინი არ ითვალისწინებენ ვენეციის კომისიის რეკომენდაციას კენჭისყრის ღიაობასთან დაკავშირებით.

"2013 წელს ვენეციის კომისიამ საქართველოს ხელისუფლებას მოგვცა რეკომენდაცია, რომ ღია კენჭისყრა გადაგვეყვანა ფარულ რეჟიმში, ეს ეხებოდა სასამართლოს. ჩვენ გადავიყვანეთ ფარული კენჭისყრის მოდელზე და ჩვენ ამ გადაწყვეტილების ერთგულნი ვრჩებით, ის არგუმენტაცია, რომელიც მაშინ იყო წარმოდგენილი არის მნიშვნელოვანი დღესაც. ვინაიდან ეს იყო ერთ-ერთი ასპექტი, რომელზეც ამახვილებდა ყურადღებას ვენეციის კომისია თავის დასკვნაში და ჩვენ ვეთანხმებით 2013 წელს მიღებულ გადაწყვეტილებას და კენჭისყრა დარჩება ფარული", — განმარტა თალაკვაძემ.

მისივე თქმით, ღია კენჭისყრა იყო ზეწოლისა და პირდაპირი კონტროლის ერთ-ერთი მთავარი მექანიზმი წინა ხელისუფლების პირობებში და ეს ჩანაწერი დარჩება უცვლელი.

ვენეციის კომისიის რეკომენდაციები უზენაესის მოსამართლეთა დანიშვნის წესებთან დაკავშირებით უკვე ცნობილია. დოკუმენტი 14-გვერდიანია და 68 პუნქტს მოიცავს. საპარლამენტო უმრავლესობა ირწმუნება, რომ დასკვნა პოზიტიურია, არასამთავრობო სექტორი და ოპოზიცია კი მიიჩნევს, რომ ვენეციის კომისია მოსალოდნელზე მეტად კრიტიკული იყო. საქართველოს პარლამენტის თავმჯდომარე კომისიის დასკვნებთან დაკავშირებით უკვე შეხვდა არასამთავრობო სექტორს, დიპლომატიურ კორპუსს და დეპუტატებს. რეკომენდაციები პარლამენტის პლენარულ სხდომაზე გუშინ უნდა განეხილა, თუმცა, ოპოზიციის მოთხოვნის და შემდგომ უმრავლესობის გადაწყვეტილების საფუძველზე, განხილვა დღეისთვის, 18 აპრილისთვის გადაიდო.