თბილისში მოსეირნე ანი, ბანი და ჰოე — ფოტორეპორტაჟი დედაენის დღიდან
1978 წელს საბჭოთა ხელისუფლებამ რესპუბლიკებში სახელმწიფო ენის გაუქმება და რუსულის მთავარ ენად დაკანონება გადაწყვიტა. თუმცა, მასობრივ დემონსტრაციებს ვერ გაუმკლავდა და უკან დაიხია. საქართველოს მოსახლეობამ ქართული ენა არ დათმო. ამ მოვლენების აღსანიშნავად 1990 წლიდან 14 აპრილი დედაენის დღედ აღინიშნება.
წელს დედაენის დღის მთავარი თემა ქართული ანბანი იყო. თბილისის ცენტრალურ ქუჩებში ანიდან ჰოემდე ყველა ასო გამოიფინა.
ქართულ-ამერიკული უნივერსიტეტის სტუდენტებმა რუსთაველის გამზირზე მსვლელობა მოაწყეს. მათ მაისურებზე, ბანერებზე და ბუშტებზე ქართული ასოები ეხატათ და გზაში ანბანს კითხულობდნენ.
მსვლელობას ესწრებოდა "იაკობ გოგებაშვილიც". მისი წაკითხული ანბანის ფონზე სტუდენტებმა ცაში "ქართული ანბანი" გაუშვეს.
შუადღისთვის თბილისის სახელმწიფო უნივერსიტეტის ეზოში ქალაქის მერიის ორგანიზებული ღონისძიებები გაიმართა. აქ გამოფენილი იყო ბანერები, წიგნები, სხვადასხვა ინსტალაციები და თამაშები ქართული ანბანის თემაზე.
ბავშვები ხატავდნენ და ძერწავდნენ ქართულ ასოებს და "ბეჭდავდნენ" დედაენის ძველ გამოცემებს.
ღონისძიებას დაესწრო ქალაქი მერი და პრემიერ-მინისტრი. მათ მოსვლამდე რამდენიმე წუთით ადრე საგანგებოდ გაემზადა გუნდი, რომელიც მთავრობის წარმომადგენლებს ქართული მუსიკით შეხვდა.
გუნდმა "ჩემო კარგო ქვეყანავ" და "მრავალჟამიერი" შეასრულა.
დედაენის დღის აღსანიშნავი აქტივობები თსუ-ში გაგრძელდა.
კომენტარები