საქართველოს სტატისტიკის ეროვნული სამსახურის კვლევის მიხედვით, ქვეყნის მასშტაბით 5-17 წლის ბავშვების სრული რაოდენობის 4,2 პროცენტი შრომაშია ჩართული. შრომის საერთაშორისო ორგანიზაციის კვლევისა და შეფასების განყოფილების უფროსი ასფარ ხანი აცხადებს, რომ ქვეყნისთვის ეს საკმაოდ კარგი მაჩვენებელია. მისი განმარტებით, ზუსტი ზღვარი და ციფრი ამ საკითხთან დაკავშირებით არ არსებობს, თუმცა საქართველოს შეუძლია იყოს ბავშვთა შრომის კუთხით თავისუფალი ქვეყანა, რადგან მსოფლიოში ყველაზე დაბალი ციფრი 2 პროცენტი პანამაში ფიქსირდება და ჩვენ ამ რიცხვთან ახლოს ვართ.

კვლევაში მონაწილეობა არ მიუღიათ ქუჩაში მცხოვრებ ბავშვებს. ამ ფაქტს სტატისტიკის ეროვნული სამსახურის წარმომადგენლები საკითხის მაღალი მგრძნობელობით ხსნიან.

ბავშვთა შრომაში ჩართულობას ქალაქისა და სოფლის მიხედვით თუ განვიხილავთ, მომუშავე ბავშვების 84% სოფელში, ხოლო 16 პროცენტი ქალაქში მუშაობს.

ქვეყნის მასშტაბით დასაქმებულ ბავშვებს შორის :

• 51,8 პროცენტი 5-13 წლისაა;
• 18,1% პროცენტი 14-15 წლისაა;
• 30,2% პროცენტი 16-17 წლისაა;

საქართველოს კანონმდებლობის მიხედვით, 14-15 წლის ასაკის ბავშვებში სამუშაოს ხანგრძლივობა კვირაში 24 საათი, ხოლო 16-17 წლის ბავშვებში კვირაში 36 საათი დასაშვებია. უფრო დაბალ ასაკში მუშაობა საერთოდ არაა დაშვებული . თუ სამუშაო საათები მოცემულ რიცხვებს გადაცდება ბავშვისთვის შრომა უკვე სახიფათო ხდება.

სახიფათო შრომაში ასევე შედის სამუშაო, მიწის ქვეშ, წყალქვეშ, არაჯანსაღ გარემოში, ხმაურის, ან ვიბრაციის პირობებში. ასევე, სამუშაო, რომელიც მოითხოვს მძიმე ტვირთის ზიდვას, საშიშ ნივთიერებებთან ან ტემპერატურაზე ყოფნას და ა.შ.

მომუშავე ბავშვები დარგების მიხედვით:

• სოფლის მეურნეობა - 82,6 პროცენტი;
• მრეწველობა - 5,2 პროცენტი;
• მომსახურება - 12,2 პროცენტი;

სოციალური სტატისტიკის სამმართველოს უფროსი გიორგი კალაკაშვილი აცხადებს, რომ საქართველოში ასეთი მასშტაბის კვლევა ამ საკითხთან მიმართებაში პირველია. მსგავსი კვლევა 1999 წელსაც ჩატარდა, თუმცა მასშტაბებით ის საკმაოდ ჩამორჩება და მონაცემების შესადარებლადაც კი არ გამოდგება.

საქართველოს სტატისტიკის ეროვნული სამსახურმა საქართველოში ბავშვთა შრომის ეროვნული კვლევის შედეგები დღეს გამოაქვეყნა. კვლევის მიზანი ქვეყანაში ბავშვთა შრომის მდგომარეობის, მასშტაბების, მიზეზებისა და შედეგების შეფასება იყო. კვლევამ დაახლოებით 7700 შინამეურნეობა და მასში დასაქმებული 5-17 წლის ბავშვები მოიცვა. კვლევა შრომის საერთაშორისო ორგანიზაციის ფინანსური და ტექნიკური მხარდაჭერით ჩატარდა.