ბათუმის საკრებულოს ქართული ოცნების დეპუტატმა, რომელიც ფიზიკურ დაპირისპირებაში ჩაება იმის დასამტკიცებლად, რომ ტერენტი გრანელი არამხოლოდ პოეტი, არამედ პროზაიკოსიცაა, ფეისბუქზე გრანელის სახელით გამოაქვეყნა ლექსი, რომელიც პოეტს არ ეკუთვნის.

"წუხელ მესიზმრა, თითქოს ვკვდებოდი,
ცრემლიც მეფრქვია ზედ დაიკოსი;
გალაკტიონი არის პოეტი,
მე კი ვარ, ძმაო, პროზაიკოსი. ტ.გრანელი", — დაწერა პატარიძემ.

ჟურნალისტი მერაბ მეტრეველი წერს, რომ ლექსის ამ ვერსიის ავტორი თავადაა და ამ ფორმით საკრებულოში მიმდინარე მოვლენებზე იხუმრა. დეპუტატმა კი ლექსი პირდაპირ გადაიტანა თავის გვერდზე, ყოველგვარი მითითების გარეშე, რაც არაერთმა ადამიანმა გააზიარა.

On.ge-სთან საუბარში დეპუტატი ამტკიცებს, რომ წინასწარვე იცოდა იმის შესახებ, რომ ლექსი გრანელს არ ეკუთვნის. მისი თქმით, მეტრეველის ხუმრობა მოეწონა და ამიტომაც გადმოიტანა ლექსი თავის კედელზე. კითხვაზე, რამდენად სწორი იყო პოეტისა და პროზაიკოსის გაურკვევლობის ფონზე საზოგადოების შეცდომაში შეყვანა, პატარიძე პასუხობს, რომ ლექსის დაპოსტვას არასწორი ინტერპრეტაცია მოყვა.

"ტერენტი პოეტიცაა და პროზაიკოსიც. ეს კი უბრალოდ ხუმრობა იყო", — განაცხადა მან.

კითხვაზე, რატომ დაწერა დეპუტატმა პოსტის გამოქვეყნებიდან ამდენი ხნის შემდეგ კომენტარი "მერაბ ჩაგეთვალა" და ხომ არ ნიშნავდა ეს, რომ მან მოგვიანებით გაიგო ლექსის ავტორის შესახებ, ის პასუხობს, რომ გაუგებარი არაფერია და მან მხოლოდ ის აღნიშნა, რომ მეტრეველის ლექსი სახუმარო იდეით წამოიღო.

დეპუტატის ამ კომენტარს წინ უძღოდა სხვისი კომენტარი, რომელშიც განმარტებული იყო, რომ ლექსი გრანელს არ ეკუთვნის.

ფოტო: კადრი ეკრანიდან

ეს პირველი შემთხვევა არ არის, როცა პატარიძემ გრანელის გადაკეთებული ლექსი შესთავაზა საზოგადოებას. საკრებულოში მომხდარი დაპირისპირების შემდეგ, მან ჟურნალისტებთან კიდევ ერთი ლექსი წაიკითხა:

"დღევანდელი საღამო არ გამოგვივიდა მშვიდი,
მაგრამ ხიდან ხეზე, აუცილებლად გადაფრინდება ჩიტი"

ბოლო ორი დღეა ბათუმის საკრებულო მედიაში ფიზიკური დაპირისპირებითა და ტერენტი გრანელის საკითხებით ხვდება. 12 აპრილს დეპუტატებმა საკრებულოში ორჯერ იჩხუბეს. მეორე ჩხუბის მიზეზი ტერენტი გრანელის ბიუსტის დადგმის საკითხი გახდა.

დადგენილების პროექტში ტერენტი გრანელი მოხსენიებული იყო, როგორც ქართული პროზის გამორჩეული წარმომადგენელი. ირაკლი პატარაძემ ტერენტი გრანელი პროზაიკოსად მოიხსენია, რის შემდეგაც ოპოზიციამ მოითხოვა განმარტება, ეს იყო ტექნიკური შეცდომა, თუ უმრავლესობა ტერენტი გრანელს როგორც პროზაიკოსს იცნობს.