ბათუმის საკრებულოში ქართული ოცნებისა და ნაციონალური მოძრაობის დეპუტატები ერთმანეთს კიდევ ერთხელ დაუპირისპირდნენ.

ამჯერად ჩხუბის მიზეზი ტერენტი გრანელის ბიუსტის დადგმის საკითხი გახდა. რუსთავი 2-ის ცნობით, დადგენილების პროექტში ტერენტი გრანელი მოხსენიებული იყო, როგორც ქართული პროზის გამორჩეული წარმომადგენელი. განათლების კომიტეტის თავმჯდომარე ირაკლი პატარაძემ ტერენტი გრანელი პროზაიკოსად მოიხსენია, რის შემდეგაც ოპოზიციამ მოითხოვა განმარტება, ეს იყო ტექნიკური შეცდომა, თუ უმრავლესობა ტერენტი გრანელს როგორც პროზაიკოსს იცნობს.

ფიზიკური დაპირისპირების მიზეზი კი ერთიანი ნაციონალური მოძრაობის წევრის მირდატ ქამადაძის კითხვა გახდა: "ტერენტი გრანელი პოეტი იყო თუ პროზაიკოსი".

On.ge-ს შინაგან საქმეთა სამინისტროში უთხრეს, რომ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

დაპირისპირება საკრებულოში დილითაც მოხდა. დილის დაპირისპირების მიზეზიც მირდათ ქამადაძის განცხადება იყო, რომელშიც მან ხელისუფლება ნეპოტიზმში დაადანაშაულა.