თამაზ ახობაძე, რომელიც დანაშაულის პრევენციის ცენტრში თანამდებობაზე აღსადგენა ხუთი წელი იდავა, თანამდებობა დატოვა. მან On.ge-ს უთხრა, რომ მიზანს მიაღწია და მუშაობა არ უღირს იმ სამსახურში, სადაც ხელმძღვანელი "ფულზე მოვაჭრეს" ეძახის.

"ჩემი ბრძოლის მიზანი არ ყოფილა სამსახურში, ხუთი წლის წინ დაკავებულ თანამდებობაზე, დაბრუნება და შესაბამისად, მორიგების ეტაპზე მე არაერთხელ შევთავაზე დანაშაულის პრევენციის ცენტრს ალტერნატიული გზები სასამართლო გადაწყვეტილების აღსრულების სანაცვლოდ", — აღნიშნავს ახობაძე Facebook-ში გამოქვეყნებულ პოსტზე.

მისი თქმით, ის დანაშაულის პრევენციის ცენტრს სთავაზობდა სამ გზას: სხვა ტოლფასს თანამდებობაზე აღდგენათ, ვერ-აღდგენის კომპენსაციას ან ბოდიშის მოხდას

"ამ დავის დაწყების დღიდან, ჩემი მიზანი იყო სამართლიანობის აღდგენა, იმისათვის რომ ჩემი ბრძოლა სამაგალითო იყოს სხვა საჯარო მოხელეებისთვის, იმისათვის რომ მომავალში ვერავინ გაბედოს მოექცეს საჯარო მოხელეს ისე, როგორც მე მომექცა იუსტიციის სამინისტროს სსიპ დანაშაულის პრევენციის ცენტრი", — განმარტავს ის.

თამაზ ახობაძემ სამსახურში აღდგენის მოთხოვნით იუსტიციის სამინისტროსთან შიმშილობა 27 თებერვალს დაიწყო. ის 7 საათზე სამინისტროსთან კარვის გაშლასაც გეგმავდა, თუმცა მან გაიგო, რომ თანამდებობაზე აღადგინეს.

ახობაძის საქმე

2014 წელს ანა სუბელიანი და თამაზ ახობაძე დანაშაულის პრევენციის ცენტრიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრიდან დავით მაისურაძის გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4-წლიანი იძულებითი განაცდურის ანაზღაურება დაეკისრა.

მოგვიანებით, ცნობილი გახდა, რომ გადაწყვეტილება, რომლითაც ახობაძის თანამდებობაზე აღდგენას შეეხებოდა მის სამუშაო ადგილზე დანიშნულმა პირმა გაასაჩივრა და სააპელაციო სასამართლომ დააკმაყოფილა კიდეც.

2018 წლის 23 ივლისს ცნობილი გახდა, რომ უზენაესმა სასამართლომ დააკმაყოფილა თამაზ ახობაძის საჩივარი და მიიჩნია, რომ მისი თანამდებობაზე აღდგენის განმხილველ საქმეებში მის ყოფილ სამუშაო ადგილზე დასაქმებული პირი არ უნდა ყოფილიყო ჩართული.

ანა სუბელიანმა სამინისტროსთან ხუთწლიანი დავა 2018 წლის 29 დეკემბერს შეწყვიტა. ის განაცდურის ანაზღაურებას დათანხმდა. როგორც სუბელიანმა აღნიშნა დათანხმდა იმაზე ნაკლებს ვიდრე ეკუთვნოდა.