თიბისი ბანკის ერთ-ერთი დამფუძნებელი და სამეთვალყურეო საბჭო თავმჯდომარე მამუკა ხაზარაძე თანამშრომლებთან გაგზავნილ წერილში აღნიშნავს, რომ ბანკი სახელმწიფო უწყებების მხრიდან უპრეცედენტო შეტევებისა და წნეხის ქვეშ არის. ამის შესახებ ინფორმაცია თავდაპირველად რუსთავი 2-მა გაავრცელა. ხოლო On.ge-ს თიბისიში დაუდასტურეს.

"ეს არის ორკესტრირებული თავდასხმა, რომლის მიზანია, ჩამოგვაშორონ მე და ბადრი ჩვენს საკუთარ საქმეს, რომელსაც 27 წელი შევწირეთ თქვენთან ერთად. ასევე, ჩვენ და ბანკს დაგვაბრალონ ყველაზე საშინელი დანაშაული, ფულის გათეთრება და შემდეგ დაეპატრონონ ბანკს", — აღნიშნულია წერილში.

მისი თქმით, დამოუკიდებელი საქართველოს ისტორიაში თიბისის გუნდი წარმატების მაგალითია და დღეს ამ გუნდის გახლეჩვა და დაშლა სურთ.

"ამას ვერ დავუშვებთ. დღეს, როგორც არასდროს, ერთად დგომა არის გადარჩენის ერთადერთი შანსი, ბრძოლა არ იქნება ხანმოკლე. სჭირდება გამძლეობა და სიმამაცე. ღმერთი იყოს ჩვენი შემწე ამ უთანასწორო და უსამართლო ომში. ჩვენ ვიბრძოლებთ, ჩვენ გავიმარჯვებთ", — წერს ხაზარაძე.

თიბისის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.