ბოლო ათწლეულების განმავლობაში, აფრიკული შავი ლეოპარდის შესახებ ამბებს ლეგენდებად ყვებოდნენ, რადგან ულამაზესი ცხოველი 110 წლის განმავლობაში არავის ჰყავდა გადაღებული.

ეს შეიცვალა, როცა კენიაში ველური ბუნების ბრიტანელი ფოტოგრაფი ვილ ბიურარდ-ლუკასი ჩავიდა და ცხოველი მთელი თავისი დიდებულებით აღბეჭდა ფირზე.

შავი აფრიკული ლეოპარდი პირველად ადგილობრივებმა ნახეს. სწორედ ამის შემდეგ ჩავიდა ფოტოგრაფი კენიაში.

ბიურარდ-ლუკასმა კამერა დაამონტაჟა, რომელიც მოძრაობის უსადენო სენსორებს მოიცავს, იმ იმედით, რომ ცხოველს ღამით მაინც გადაიღებდა. რამდენიმედღიანი უშედეგო ლოდინის შემდეგ, მან სურათები კიდევ ერთხელ გადაათვალიერა და სიბნელეში ორი თვალი შენიშნა.

ის პირველი ფოტოგრაფი გახდა, რომელმაც შავი ლეოპარდი 1909 წლის შემდეგ გადაიღო.

ასე გამოიყურება ბიურარდის მიერ გადაღებული შავი აფრიკული ლეოპარდი:

ფოტო: Burrard-Lucas Photography

ცხოველი განსაკუთრებული და ძალიან იშვიათია — მისი ბეწვი მელანიზმის გამო მთლიანად შავია. ეს ალბინიზმის საწინააღმდეგო მდგომარეობაა.

ფოტო: Burrard-Lucas Photography

"მელანიზმი, დიდ კატებში, რეცესიულ გენთან არის დაკავშირებული. ამას გარემო პირობებიც განაპირობებს. ანუ, შავი შეფერილობის გარეგნობა ცხოველებს იმ შემთხვევაში "აწყობთ", როდესაც ამ შავი შეფერილობით კარგად იმალებიან. ეს ძირითადად ხდება ტროპიკულ ტყეებში და იმიტომაც არის სამხრეთ ამერიკაში იაგუარი შავი შეფერილობის. იაგუარი ძირითადად ბინადრობს ამაზონიის ჯუნგლებში და ტყეში შავი ფერით უკეთ იმალება. აი რაც შეეხება აფრიკულ ლეოპარდს, ის ძირითადად უდაბნო გარემოშია და მისი შავი შეფერილობის ვარიაცია, სწორედ ამიტომ არის საინტერესო", - უთხრა On.ge-ს მკვლევარმა ხატია ბასილაშვილმა.

ფოტო: Burrard-Lucas Photography

ფოტო: Burrard-Lucas Photography

ფოტო: Burrard-Lucas Photography

ფოტო: Burrard-Lucas Photography