სამხრეთ ოსეთის დე ფაქტო პარლამენტი ვენესუელაში მიმდინარე მოვლენებს გამოეხმაურა და ნიკოლას მადუროს სრული მხარდაჭერა აღუთქვა. დე ფაქტო პარლამენტს მიაჩნია, რომ აშშ-ს კარაკასში მორიგი "ფერადი" რევოლუციის მოწყობა და მარიონეტული რეჟიმის დამყარება სურს.

"ამერიკული ხელისუფლების მოქმედებები ცხადყოფს, რომ ვენესუელაში სახელმწიფო გადატრიალების უკან სწორედ ისინი დგანან, რითაც მასშტაბურ სისხლისღვრას აპროვოცირებენ", — ნათქვამია განცხადებაში.

სამხრეთ ოსეთისა და აფხაზეთის დე ფაქტო რესპუბლიკები ვენესუელის კრიზისში ნიკოლას მადუროს მხარდამჭერები არიან. ვენესუელა იმ ხუთ ქვეყანას შორისაა, რომელმაც 2008 წლის აგვისტოს ომის შემდეგ აფხაზეთისა და სამხრეთ ოსეთის დამოუკიდებლობა აღიარა. დე ფაქტო პრეზიდენტები 11 იანვარს მადუროს ინაუგურაციასაც დაესწრნენ.

ვენესუელის კრიზისი

ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს.

23 იანვარს ვენესუელის ეროვნული ასამბლეის თავმჯდომარემ, ხუან გუაიდომ თავი პრეზიდენტის მოვალეობის დროებით შემსრულებლად გამოაცხადა. ოპოზიციის ლიდერი დაპირდა ხალხს, რომ დაასრულებს ძალაუფლების უზურპაციას, ჩამოაყალიბებს გარდამავალ მთავრობას და ჩაატარებს სამართლიან არჩევნებს.

პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლათ ნიკოლას მადუროს წინააღმდეგ.

ქვეყნის გარდამავალ პრეზიდენტად ხუან გუაიდო პირველად აშშ-ს პრეზიდენტმა, დონალდ ტრამპმა აღიარა. სპეციალურ განცხადებაში ტრამპმა აღნიშნა, რომ ქვეყნის ლეგიტიმური მმართველი ახლა გუაიდოა და არა ნიკოლას მადურო.

სპეციალური ვიდეო მიმართვა გაავრცელა აშშ-ს ვიცე პრეზიდენტმა მაიკ პენსმაც. პენსმა ნიკოლას მადურო დიქტატორად მოიხსენია და ვენესუელის მოსახლეობას სრული მხარდაჭერა აღუთქვა.

შტატების შემდეგ მსგავსი განცხადება გაავრცელეს კანადამ, კოლუმბიამ, პერუმ, ბრაზილიამ, არგენტინამ, ჩილემ, პარაგვაიმ, ბოლივიამ, ეკვადრომა, პანამამ, გვატემალამ, ჰონდურასმა, კოსტა-რიკამ და საქართველომ.

მადუროს მხარდაჭერა თურქეთმა, რუსეთმა, კუბამ, ბოლივიამ, მექსიკამ და ჩინეთმა გამოუცხადეს. მადურო ლეგიტიმურ პრეზიდენტად აღიარეს აფხაზეთისა და სამხრეთ ოსეთის დე ფაქტო რესპუბლიკებმა.

26 იანვარს ესპანეთმა, გერმანიამ, საფრანგეთმა და დიდმა ბრიტანეთმა ნიკოლას მადუროს არჩვენების დანიშვნისთვის რვადღიან ვადა მისცეს — წინააღმდეგ შემთხვევაში ოპოზიციურ მთავრობას ოფიციალურად აღიარებენ. მადურომ ულტიმატუს უპასუხა და განაცხადა, რომ არჩევნების დანიშვნას არ აპირებს.

ამავე თემაზე: