თურქეთის პრეზიდენტი რეჯეპ ტაიპ ერდოღანი ვენესუელის პრეზიდენტს, ნიკოლას მადუროს მხარდაჭერას უცხადებს. თურქეთის პრეზიდენტის წარმომადგენლის თქმით, ერდოღანმა მადუროს მას შემდეგ დაურეკა, რაც ეროვნული ასამბლეის თავმჯდომარემ, ხუან გუაიდომ თავი დროებით პრეზიდენტად დაასახელა.

"ჩვენმა პრეზიდენტი აცხადებს, რომ აფართოებს თურქეთის მხარდაჭერას ვენესუელის პრეზიდენტის, ნიკოლას მადუროსმიმართ. მან უთხრა მადუროს: "ჩემო ძმაო, მადურო! მედგრად დადექი, ჩვენ მხარს გიჭერთ!", — წერს ტვიტერზე იბრაჰიმ ქალინი.

ბოლო რამდენიმე დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს.

ადგილობრივი მედიის ინფორმაციით, მიმდინარე საპროტესტო აქციებს 16 ადამიანი ემსხვერპლა. პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლათ ნიკოლას მადუროს წინააღმდეგ.

23 იანვარს ვენესუელის ეროვნული ასამბლეის თავმჯდომარემ, ხუან გუაიდომ თავი პრეზიდენტის მოვალეობის დროებით შემსრულებლად გამოაცხადა. ოპოზიციის ლიდერი დაპირდა ხალხს, რომ დაასრულებს ძალაუფლების უზურპაციას, ჩამოაყალიბებს გარდამავალ მთავრობას და ჩაატარებს სამართლიან არჩევნებს.

ქვეყნის გარდამავალ პრეზიდენტად ხუან გუაიდო პირველად აშშ-ს პრეზიდენტმა, დონალდ ტრამპმა აღიარა. სპეციალურ განცხადებაში ტრამპმა აღნიშნა, რომ ქვეყნის ლეგიტიმური მმართველი ახლა გუაიდოა და არა ნიკოლას მადურო.

სპეციალური ვიდეო მიმართვა გაავრცელა აშშ-ს ვიცე პრეზიდენტმა მაიკ პენსმაც. პენსმა ნიკოლას მადურო დიქტატორად მოიხსენია და ვენესუელის მოსახლეობას სრული მხარდაჭერა აღუთქვა.

შტატების შემდეგ მსგავსი განცხადება გაავრცელეს კანადამ, კოლუმბიამ, პერუმ, ბრაზილიამ, არგენტინამ, ჩილემ, პარაგვაიმ, ბოლივიამ და საქართველომ. რაც შეეხება რუსეთს, პოლიტიკოსებისა და ჩინოვნიკების ნაწილი აშშ-ს სახელმწიფო გადატრიალების მხარდაჭერაში ადანაშაულებენ.

ამავე თემაზე: