რუსეთის საგარეო საქმეთა სამინისტრომ ნიკოლას მადუროს ვენესუელის კანონიერ პრეზიდენტი უწოდა. მათივე თქმით, არსებული სიტუაცია ქვეყანას ქაოსამდე მიიყვანს.

განცხადებაში, ასევე, ვკითხულობთ, რომ მოსკოვი ვაშინგტონს საერთაშორისო ნორმების დარღვევასა და არასასურველი რეჟიმის შეცვლაში ადანაშაულებს. ისინი მოუწოდებენ ვენესუელის პოლიტიკოსებს არ იქცნენს "ჭადრაკის ფიგურებად სხვის თამაშში".

"ჩვენ მკაცრად ვგმობთ მათ, ვინც ვენესუელის საზოგადოებას სისხლიან სამოქალაქო დაპირისპირების უფსკრულში უბიძგებს", — ნათქვამია განცხადებაში.

23 იანვარს ვენესუელის ეროვნული ასამბლეის თავმჯდომარემ, ხუან გუაიდომ თავი პრეზიდენტის მოვალეობის დროებით შემსრულებლად გამოაცხადა. ოპოზიციის ლიდერი დაპირდა ხალხს, რომ დაასრულებს ძალაუფლების უზურპაციას, ჩამოაყალიბებს გარდამავალ მთავრობას და ჩაატარებს სამართლიან არჩევნებს.

ბოლო რამდენიმე დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს.

ადგილობრივი მედიის ინფორმაციით, მიმდინარე საპროტესტო აქციებს 16 ადამიანი ემსხვერპლა. პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლათ ნიკოლას მადუროს წინააღმდეგ.

ქვეყნის გარდამავალ პრეზიდენტად ხუან გუაიდო პირველად აშშ-ს პრეზიდენტმა, დონალდ ტრამპმა აღიარა. სპეციალურ განცხადებაში ტრამპმა აღნიშნა, რომ ქვეყნის ლეგიტიმური მმართველი ახლა გუაიდოა და არა ნიკოლას მადურო.

სპეციალური ვიდეო მიმართვა გაავრცელა აშშ-ს ვიცე პრეზიდენტმა მაიკ პენსმაც. პენსმა ნიკოლას მადურო დიქტატორად მოიხსენია და ვენესუელის მოსახლეობას სრული მხარდაჭერა აღუთქვა.

შტატების შემდეგ მსგავსი განცხადება გაავრცელეს კანადამ, კოლუმბიამ, პერუმ, ბრაზილიამ, არგენტინამ, ჩილემ, პარაგვაიმ, ბოლივიამ და საქართველომ. მადუროს მხარდაჭერა თურქეთმა გამოუცხადა.

ამავე თემაზე: