ბათუმის შოთა რუსთაველის სახელმწიფო უნივერსიტეტის ადმინისტრაციის განცხადებით, წითელას აცრაზე უარის თქმის შემთხვევაში სტუდენტის სტატუსის შეჩერების საკითხს განიხილავენ. უნივერსიტეტში აცხადებენ, რომ სტუდენტები ვალდებული არიან ვაქცინაციის ჩატარების დამადასტურებელი დოკუმენტი უმოკლეს ვადაში წარმოადგინონ.

სურვილის შემთხვევაში უნივერსიტეტი სტუდენტებს ვაქცინაციას შიდა ტერიტორიაზე სთავაზობს.

19 იანვრიდან წითელას აცრა ნებისმიერი მოქალაქისთვის უფასო გახდა. ჯანდაცვის მინისტრმა მოუწოდება იმ ადამიანებს, ვისაც არ ახსოვთ ან არ ჩაუტარებიათ წითელას აცრა აუცილებლად მიმართონ ექიმს ვაქცინაციისთვის.

დაავადებათა კონტროლის ცენტრის პრესსამსახურმა On.ge-უთხრა, რომ 2019 წლის პირველი იანვრიდან 16 იანვრამდე წითელას 312 შემთხვევა დაფიქსირდა. დაავადების შემთხვევათა 56% ძირითადად, 20-დან 40 წლამდე ასაკის პირებზე მოდის.

წითელა მწვავე ვირუსული დაავადებაა, გადაეცემა ჰაეროვანი გზით ან ინფიცირებული ადამიანის ცხვირ-ხახის სეკრეტთან პირდაპირი ან არაპირდაპირი კონტაქტით და გამოირჩევა მაღალი გადამდებლობით.

დაავადების სიმპტომებია სიცხე, მაკულოპაპულოზური (არავეზიკულური) გამონაყარი და ხველება, რინიტი ან კონიუნქტივიტი, რომელთა გამოვლენა სერიოზულ გართულებებს იწვევს. ვირუსთან კონტაქტის შემდეგ იმუნიტეტის არმქონე ინდივიდების 90%-ზე მეტი ავადდება.

2019 პირველი იანვრიდან საქართველოს ტერიტორიაზე მაცხოვრებელი ნებისმიერი ადამიანი ვალდებულია, რომ ეროვნული კალენდრით განსაზღვრული პროფილაქტიკური აცრები გაიკეთოს.