ექიმის ცემაში ბრალდებულ მსახიობს, რეზო ნასიძეს აღკვეთის ღონისძიების სახით 5 ათას ლარიანი გირაო შეეფარდა. მსახიობი სამედიცინო კლინიკაში ბადრაგების მეთვალყურეობის ქვეშ იქამდე დარჩება, ვიდრე თანხას არ გადაიხდის.გადაწყვეტილება მოსამართლემ გუშინ, 10 იანვარს გამოაცხადა.

"ნამდვილად არ იყო საჭირო გამოყენებული ყოფილიყო ყველაზე მკაცრი აღკვეთი ღონისძიება, ჩვენ ვითხოვდით გირაოს, იმ სიტუაციიდან გამომდინარე რაშიც აღმოვჩნდით. მისი ეს სიტუაცია გამოწვეულია მისი ჯანმრთელობის ურთულესი მდგომარეობით", — განაცხადა ადვოკატმა, ვახტანგ კვიჟინაძემ.

შემთხვევა წმინდა მიქაელის სახელობის კლინიკაში რამდენიმე დღის წინ მოხდა. ნასიძე სამართალდამცველებმა სასამართლოს განჩინების საფუძველზე დააკავეს.

საავადმყოფოს პერსონალი ამტკიცებს, რომ პაციენტი ნარკოტიკს ითხოვდა, რასაც მისი დიაგნოზი არ ითვალისწინებდა, უარის შემდეგ კი ის ექიმს ფიზიკურად გაუსწორდა. ამ ბრალდებას კი არ ეთანხმება ოჯახი და ინციდენტის პროვოცირებაში ექიმს ადანაშაულებს.