საშობაო მსვლელობა თბილისში

თბილისის ცენტრალურ ქუჩებში საშობაო მსვლელობა "ალილო" გაიმართა. მართლმადიდებელი სამყაროს ნაწილი დღეს, 7 იანვარს შობის დღესასწაულს აღნიშნავს. ტრადიციულად, მსვლელობის მონაწილეებმა ტკბილეული და საჩუქრები შეაგროვეს, რომლებიც, მათი თქმით, ბავშვთა სახლებსა და მოხუცთა თავშესაფრებს უნდა გადაეცეს.

მამა დავით კონჯარია On.ge-ს უყვება, რომ თეატრალიზებული წარმოდგენით ქრისტეშობის დროს მომხდარი მოვლენები აღადგინეს:

"ანგელოზები ღებულობდნენ მონაწილეობას, მწყემსები, რომლებიც მივიდნენ და თაყვანი სცენ, მოგვები, რომლებიც მივიდნენ და ძღვენი მიართვეს, ასევე, ცხოველები".

**ალილოს მსვლელობა. თბილისი, 7 იანვარი, 2019**

ფოტო: გვანცა ნემსაძე / On.ge

ანგელოზისა და მწყემსის ფორმაში გამოწყობილმა ბავშვებმა, მებაირაღეებმა და უღელში გაბმულმა, საშობაოდ მორთულმა ხარებმა რესპუბლიკის მოედანზე შეკრება 13 საათიდან დაიწყეს. ერთ საათში ისინი რუსთაველის გამზირის გავლით, თავისუფლების მოედნისკენ დაიძრნენ.