"ხშირად არის ხაზგასმა იმაზე, რომ აი, ქალებზე ძალადობაზე ლაპარაკი. და კაცებზე არ ძალადობენ ქალები?" — ამის შესახებ პატრიოტთა ალიანსის დეპუტატმა, ეზმარ კვიციანმა ადამიანი უფლებათა დაცვის კომიტეტზე განაცხადა. კომიტეტზე ქალთა მიმართ დისკრიმინაციის ყველა ფორმის აღმოფხვრის შესახებ კონვენციის შესრულების თაობაზე საქართველოს VI პერიოდული ანგარიშის პროექტი განიხილებოდა.

სხდომაზე კვიციანმა არაერთხელ განაცხადა, რომ ახლა განქორწინება ადვილია და სახელმწიფომ ყველაფერი უნდა გააკეთოს, რათა "ოჯახები არ ინგრეოდეს".

"ქალებზე ძალადობა არ არის სისხლის სამართლის კოდექსით გათვალისწინებული? აბა, რას ჩავჩიჩინებთ მაგას? ან საერთოდ, რატომ არ ვუკრძალავთ ტელევიზიებს... ვინც კი უყურებს რუსთავი 2-სა და ნანუკას შოუს, იმ ქალების 90 პროცენტს ოჯახები აქვთ დანგრეული... მიზანმიმართულად მიდის ჩვენი ოჯახების დანგრევა და ჩვენი სახელმწიფოს დანგრევა", — განაცხადა კვიციანმა.

ქალთა მიმართ დისკრიმინაციის ყველა ფორმის აღმოფხვრის შესახებ კონვენციის შესრულების შესახებ ანგარიშის მომზადება ქართულ მხარეს დოკუმენტის მე-18 მუხლის საფუძველზე აკისრია.

აღნიშნულ სხდომას ესწრებოდა პარლამენტში ომბუდსმენის წარმომადგენელი, თათული თოდუა. როგორც მან On.ge-ს განუცხადა, სხვადასხვა დისკუსიებში ხშირად ისმის, რომ კაცებიც არიან მსხვერპლები. მისივე თქმით, საქართველოში არსებული პატრიარქალური კულტურა განაპირობებს იმ რეალობასა და სტატისტიკას, რაც ქალთა მიმართ ძალადობის კუთხით არსებობს.

"ოჯახში ძალადობის მსხვერპლები, უმრავლეს შემთხვევაში, არიან სწორედ ქალები. არის გამონაკლისის შემთხვევებიც, თუმცა ფაქტია, რომ ის პატრიარქალური კულტურა, რომელიც არის ჩვენს ქვეყანაში იწვევს საბოლოო ჯამში ასეთი ტიპის შემთხვევებს. როდესაც ადამიანები სვამენ ამ კითხვებს, რატომ ვსაუბრობთ ქალთა ძალადობაზე, მათ ავიწყდება, რა ტიპის კულტურაში ვცხოვრობთ", — ამბობს ომბუდსმენის წარმომადეგენელი.

მისივე თქმით, თუ არსებობს კითხვები ამასთან დაკავშირებით სჯობს ისინი მოვისმინოთ, ვიდრე "პოლიტკორექტულობის საფარქვეშ დავმალოთ", რადგან მათ პასუხი უნდა გაეცეს.

"მესმის, ზოგადად, ის გაკვირვება, რომელიც მოჰყვება, ასეთი შეკითხვების დასმას პარლამენტის წევრების მხრიდან. მათ მიმართ ბუნებრივია, სხვა მოლოდინია, რომ მათ უკეთესად ესმით ქვეყანაში არსებული რეალობა, რომ პარლამენტის წევრის ინფორმირებულობა უნდა იყოს იმდენად მაღალი, რომ ასეთი ტიპის შეკითხვები მათი მხრიდან არ იყოს", — განუცხადა თოდუამ On.ge-ს.