გაერთიანებული ოპოზიცია და მათი მხარდამჭერები სამომავლო გეგმებზე სასაუბროდ გომბორის უღელტეხილის გადასახვევთან იკრიბებიან. ამის შესახებ On.ge-ს ნაციონალური მოძრაობის პრესსამსახურში განუცხადეს.

დღეს, 16 დეკემბერს, როცა სალომე ზურაბიშვილის პრეზიდენტად ინაუგურაცია იმართებოდა, ოპოზიციამ აქცია დაგეგმა. თელავისკენ მიმავალ ოპოზიციას და მათ მხარდამჭერებს გზა ავტობუსებითა და მანქანებით ჩახერგელი სოფელ ველისციხესთან დახვდათ. ისინი ამბობდნენ, რომ შინაგან საქმეთა სამინისტრო მათ გადაადგილების უფლებას უზღუდავდა, უწყება კი განმარტავდა, რომ შეზღუდვების შესახებ წინასწარ აცნობეს მათ. ოპოზიცია გზის გახსნას რამდენიმე საათი ცდილობდა, თუმცა უშედეგოდ.

შსს-ს ხელმძღვანელი პირები ამბობდნენ, რომ მათ ალტერნატიული გზა და ტრანსპორტი შესთავაზეს.