გრემის ჯილდოს ათგზის მფლობელმა ბილი აილიშმა მალე შეიძლება დიდი სცენიდან დიდ ეკრანზე გადაინაცვლოს. ამერიკელი სუპერვარსკვლავი სილვია პლათის ზარხუფის ეკრანიზაციაში მთავარი როლის შემსრულებლად განიხილება. რამდენიმე გამოცემის ცნობით, მოლაპარაკებები უკვე დასკვნით ეტაპზეა.

ფილმის რეჟისორი და სცენარისტი სარა პოლი იქნება, რომელმაც 2023 წელს ოსკარი დაიმსახურა საუკეთესოდ ადაპტირებული სცენარის ნომინაციაში. პროექტის პროდიუსერი კი ჯოი გორმანია, რომელსაც ნეტფლიქსის პოპულარულ სერიალზე 13 Reasons Why უმუშავია.

რაც შეეხება აილიშს, ეს მისთვის სამსახიობო დებიუტი არაა: მომღერალი 2023 წელს სერიალში Swarm გამოჩნდა.

"სულ ვამბობდი ხოლმე, მსახიობობა მძულს-მეთქი, მაგრამ, სიმართლე ითქვას, ბავშვობაში ეს საქმე ძალიან მომწონდა", — განაცხადა აილიშმა წინათ, — "ჩემი მშობლებიც და ძმაც მსახიობები არიან და ოცნებად მქონდა, ფილმში მეთამაშა".

ბავშვობის ამ ოცნების ასრულებამდე აილიშს სულ ცოტა აშორებს. თუმცა, მან უკვე ისედაც ორჯერ მოიგო კინოსამყაროს მთავარი ჯილდო, ოსკარი, ფილმებისთვის დაწერილი სიმღერებისთვის.

ფოტო: FilmMagic

ზარხუფი ლეგენდარული ამერიკელი პოეტის, სილვია პლათის, ერთადერთი რომანია, რომელიც მის თვითმკვლელობამდე ერთი თვით ადრე გამოიცა ვიქტორია ლუკასის ფსევდონიმით. ამ ნახევრად-ავტობიოგრაფიული წიგნის მთავარი გმირი მწერლობის ამბიციის მქონე სტუდენტი ესთერ გრინვუდია, რომელსაც 1950-იანი წლების ამერიკაში მენტალური ჯანმრთელობის პრობლემებთან გამკლავება უწევს.

პლათის რომანი 1979 წელსაც გადაიღეს ფილმად, თუმცა, ეკრანიზაციას მეტწილად უარყოფითი შეფასებები მოჰყვა. ზარხუფის კინოადაპტაციის შექმნა კიდევ რამდენჯერმე იგეგმებოდა, მათ შორის, ერთხელ — დაკოტა ფენინგით მთავარ როლში, თუმცა, არცერთი პროექტი არ განხორციელებულა.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...