შინაგან საქმეთა სამინისტროს ინფორმაციით, კახეთის მიმართულებით და ქალაქ თელავში ტრანსპორტის მოძრაობა დროებით შეიზღუდება. მიზეზი სალომე ზურაბიშვილის პრეზიდენტად ინაუგურაციის ღონისძიებაა.

On.ge-ს ჟურნალისტის ინფორმაციით, გომბორის უღელტეხილისკენ მიმავალი გზა საპატრულო პოლიციას გადაკეტილი ჰქონდა, თუმცა შსს-ს პრესსამსახურში ამ ინფორმაციას არ ადასტურებენ.

უწყებაში ასევე აღნიშნავენ, რომ, ამავდროულად, დაიცავენ ინაუგურაციის პარალელურად მიმდინარე აქციის მონაწილეების უსაფრთხოებას.

"უზრუნველყოფილი იქნება როგორც ინაუგურაციის მშვიდ გარემოში ჩატარების საკითხი, ისე საპროტესტო აქციების მონაწილეთა გამოხატვის თავისუფლება და ყველა მოქალაქის უსაფრთხოება", — აღნიშნავენ შსს-ში.

დღეს, 16 სექტემბერს საქართველოს პრეზიდენტის, სალომე ზურაბიშვილის ინაუგურაცია იმართება. ცერემონია თბილისის ნაცვლად კახეთში, ერეკლე მეფის სასახლეში გაიმართება.
სასახლის მიმდებარე ტერიტორია საპატრულო პოლიციას აქვს გადაკეტილი. ღონისძიებაზე დასწრება მხოლოდ მიწვეულ სტუმრებს შეეძლებათ.

ღონისძიების პარალელურად თელავში იმართება გაერთიანებული ოპოზიციის საპროტესტო აქცია. ოპოზიცია არჩევნების შედეგებს არ აღიარებს და ინაუგურაციას არაოფიციალურს უწოდებს.