შოტლანდია გახდება პირველ ქვეყანა, რომლის საჯარო სკოლებშიც ლგბტი უფლებების გაკვეთილები ჩატარდება. ამ საკითხებზე მომუშავე ჯგუფი დრო ინკლუზიური განათლებისთვის (TIE) ამბობს, რომ ეს ისტორიული გადაწყვეტილებაა.

The Guardian წერს, რომ სკოლები ვალდებული იქნებიან, მოსწავლეებს ასწავლონ ლგბტ მოძრაობის ისტორია და უფლებები, გარდა ამისა, ებრძოლონ ჰომოფობიასა და ტრანსფობიას.

TIE-ს ერთ-ერთი დამფუძნებელი, ჯორდან დელი ამბობს, რომ 28-ე შესწორების "დესტრუქციული მემკვიდრეობა" დასასრულს მიუახლოვდა. 1988 წელს მიღებული შესწორების მიხედვით, დიდი ბრიტანეთის ადგილობრივ ხელისუფლებას ხელი უნდა შეეშალა "ჰომოსექსუალიზმის პოპულარიზაციისთვის". ეს შესწორება 2003 წლისთვის დიდ ბრიტანეთში გაუქმდა.

"სახელმწიფო სკოლებში ლგბტი ინკლუზიური განათლების შემოღება პირველად ხდება. გლობალური გაუგებრობის პირობებში, ეს არის ძლიერი და ნათელი მესიჯი ახალგაზრდებისთვის, რომ ლგბტი ახალგაზრდებს აქ, შოტლანდიაში აფასებენ", — განაცხადა ჯორდან დელიმ.

პირველი მინისტრის მოადგილემ, ჯონ სვინიმ განაცხადა, რომ მოხარულია განათლების სისტემაში მსგავსი ცვლილებით.

"ჩვენი განათლების სისტემამ ყველას უნდა დაუჭიროს მხარი, რათა მათ სრულად შეძლონ პოტენციალის განვითარება. ამიტომაც არის მნიშვნელოვანი, რომ სასწავლო პროგრამა იყოს ისეთივე მრავალფეროვანი, როგორი მრავალფეროვანი ახალგაზრდებიც სწავლობენ".

TIE-ს კვლევების მიხედვით, ათიდან ცხრა მოსწავლე სკოლაში ჰომოფობიის მსხვერპლია, ხოლობულინგის შემდეგ ლგბტი მოსწავლეების 27 პროცენტმა თვითმკვლელობა სცადა. გარდა ამისა, კვლევებმა აჩვენა, რომ სკოლებში ცოტა რამ არის ცნობილი ინტერსექსუალების შესახებ.

ლგბტი უფლებების კუთხით შოტლანდია ევროპაში ერთ-ერთ ყველაზე განვითარებულ ქვეყნად ითვლება, მიუხედავად იმისა, რომ ჰომოსექსუალიზმის დეკრიმინალიზაცია მოხდა 1980 წელს, 13 წლით გვიან, ვიდრე ინგლისსა და უელსში.