ყველა ერთხელ მაინც შემოვმსხდარვართ კოცონის გარშემო საშიში ისტორიების მოსასმენად ან თავზე საბანგადაფარებულებს გვინახავს საშინელებათა ფილმები. ჰორორი და მისტიკა უნებურად გვიზიდავს და უფრო მრავალფეროვანს ხდის ჩვენს ყოველდღიურობას. ჰელოუინის ღამეც ბევრისთვის საყვარელი დღესასწაულია, რომლისთვისაც დიდი მონდომებით ემზადებიან უამრავ ქვეყანაში. მოემზადე შენც, გაეცანი ჩვენ მიერ შერჩეულ, ჰელუინზე საკითხავი წიგნების სიას და შეივსე საშიში ისტორიების მარაგი!

1. უილიამ პიტერ ბლეტი – ეგზორცისტი

ავტორის თქმით, სადღაც მეცნიერებასა და ზებუნებრივს შორის სხვა სამყაროა და მისი შეცნობა მხოლოდ გონებით შეუძლებელია. მით უმეტეს, ადამიანი უძლურია, თუ ეს სამყარო თავის წარმომადგენელს დედამიწაზე გზავნის და მოზარდის სხეულში შეასახლებს. სწორედ მაშინ დაისმის კითხვა: სად მთავრდება რეალობა და სად გადის ზღვარი მეცნიერებასა და ზებუნებრივს შორის? ამ კითხვაზე საინტერესო პასუხს გვთავაზობს უილიამ პიტერ ბლეტი – ადამიანი, რომელიც მთელი ცხოვრება წერდა ფსიქიკაზე მოქმედ დემონებზე, თავად კი მსგავს ლიტერატურას არასოდეს კითხულობდა. წიგნის მიხედვით გადაღებულია ფილმიც, რომელმაც არაერთი, მათ შორის კინოაკადემიის უმაღლესი ჯილდო დაიმსახურა.

2. ჰილჰაუსის მოჩვენება – შირლი ჯექსონი

შირლი ჯექსონის ამ რომანში ერთმანეთისგან რადიკალურად განსხვავებულ ადამიანთა პატარა ჯგუფი ზაფხულის ცხელ თვეს მიყრუებულ აგარაკზე ატარებს და ცდილობს, უცნაურ არსებებთან დაამყაროს კავშირი. ავტორი მკითხველის შეშინებას იაფფასიანი ხრიკებით არ ცდილობს. ეს გახლავთ ღრმა ფსიქოლოგიური თრილერი, რომელშიც რთულია, ერთმანეთისგან გაარჩიო პარანორმალური მოვლენა და უძილობისგან გამოფიტული ადამიანის ფანტაზიის ნაყოფი. „ჰილ ჰაუსის მოჩვენება“ ჯექსონის ყველაზე ცნობილი წიგნია. რომანი დღეს საშინელებათა ჟანრის ერთ-ერთ საუკეთესო ნაწარმოებად მიიჩნევა. მისი მიხედვით შექმნილია ამავე სახელწოდების პიესა და ორი ფილმი.

3. ნანტაკეტელი არტურ გორდონ პიმის ნაამბობი – ედგარ ალან პო

ნანტაკეტელი ახალგაზრდა კაცი, არტურ გორდონ პიმი, ბრიგ "გრამპუსის" ტრიუმში იმალება, რათა ამ ხომალდით სამხრეთის ზღვებში იმოგზაუროს. მაგრამ მეზღვაურები გემზე ამბოხებას მოაწყობენ. სისხლიანი ხოცვა-ჟლეტის შემდეგ ოთხი კაციღა რჩება ცოცხალი და ისინი აბობოქრებულ ოკეანეში რჩებიან მშიერ-მწყურვალნი და ზვიგენებით გარშემორტყმულნი. განწირულ ზღვაოსნებს სამხრეთ პოლუსისკენ მიმავალი გემი გადაარჩენს...

ნანტაკეტელი არტურ გორდონ პიმის ნაამბობი (1838) ედგარ პოს ყველაზე გამოუცნობ ნაწარმოებადაა მიჩნეული და ჰორორის ჟანრის თხზულებების წინამორბედად ითვლება.

4. თილისმა – სტივენ კინგი; პიტერ სტრაუბი

თილისმა სტივენ კინგისა და პიტერ სტრაუბის ერთობლივი რომანია. საშინელებათა ჟანრის ორი სახელგანთქმული მწერლის ამ ნამუშევარმა, მალე მოიპოვა აღიარება და არაერთი ლიტერატურული ჯილდო დაიმსახურა. უჩვეულო, დაძაბული სიუჟეტი, რომელსაც დღემდე თვალს ვერ სწყვეტს მკითხველი, ერთგულებასა და შიშზე მოგვითხრობს. ყოვლისმომცველი ბოროტების წინაშე მდგარი თორმეტი წლის ბიჭის ამბავი „თილისმას“ მართლაც გამოარჩევს ფენტეზის ჟანრში დაწერილი სხვა ნაწარმოებებისგან. ჯეკ სოიერი, რომელიც სასოწარკვეთილი ცდილობს, სიკვდილისაგან იხსნას დედა, წარმოუდგენლად საშიშ გარემოში ხვდება. უდანაშაულო მსხვერპლით, ურჩხულებით, მისტერიითა და დაუჯერებელი ხიფათით სავსე სამყაროში გადარჩენა მისი უმთავრესი ამოცანაა.

5. მე ვარ ლეგენდა – რიჩარდ მეთისონი

ამერიკელი მწერლისა და სცენარისტის, რიჩარდ მეთისონის (1926-2013) საკულტო რომანი მე ვარ ლეგენდა პოსტაპოკალიფსურ ჟანრს განეკუთვნება. მან უდიდესი გავლენა მოახდინა თანამედროვე ლიტერატურაში ვამპირებისა და ზომბების სახეების ჩამოყალიბებაზე.
წიგნის მთავარი პერსონაჟი ბოლო ადამიანია დედამიწაზე. საშინელი პანდემიის გამო მისი ყოველი მცხოვრები ვამპირად იქცა. მხოლოდ რობერტ ნევილს ვერ დააკლო ვირუსმა ვერაფერი. გმირი მარტოდმარტო, შეუპოვრად ებრძვის ვამპირებს – სხვა გზა არა აქვს. იმისათვის, რომ გადარჩეს, მან არ უნდა დაკარგოს იმედი, მიუხედავად იმისა, რომ ერთადერთი ცოცხალი არსება, ძაღლი მოუკვდება, ქალი კი უღალატებს...
რომანის მოტივებზე რამდენიმე ფილმია გადაღებული.

6. კრავთა დუმილი – თომას ჰარისი

კრავთა დუმილი რომანი-გამოცანაა. აქ ერთმანეთს უპირისპირდებიან გამოძიების ფედერალური ბიუროს აკადემიის სტუდენტი კლარის სტარლინგი, რომელიც სერიული მკვლელის დანაშაულებს იძიებს და მისი "კონსულტანტი და მოკავშირე" – ბრწყინვალე ფსიქიატრი და, ამავე დროს, მკვლელი და კანიბალი-გურმანი, ექიმი ჰანიბალ ლექტერი. ვერავინ იგრძნობს თავს უსაფრთხოდ, თუკი ლექტერი ფსიქიატრიული საავადმყოფოს სპეციალურ საკანში არ იქნება დამწყვდეული. სტარლინგს კი შეუძლია, გულთან ახლოს მიიტანოს სხვისი უბედურება. სწორედ ეს განსაზღვრავს ყოველ მის ქცევას. რომანის მიხედვით გადაღებულ ცნობილ ფილმს ხუთი ოსკარი აქვს მოპოვებული.

თუმცა, ჰელუინი მხოლოდ საშიშ მოჩვენებებსა და ჩონჩხებთან არ ასოცირდება! სინამდვილეში სახალისო დღესასწაულია, რომელშიც მონაწილეობას პატარებიც სიამოვნებით იღებენ. ამიტომ გადავწყვიტეთ, ცოტა საშიში, მაგრამ საინტერესო საკითხავი წიგნები მათთვისაც შეგვეთავაზებინა.

1. სასაფლაოს წიგნი – ნილ გეიმანი

არავინ არავისია, რომელსაც მეგობრები ვინის ეძახიან, ერთი ჩვეულებრივი ბიჭია. კიდევ უფრო ჩვეულებრივი იქნებოდა, სასაფლაოზე რომ არ ცხოვრობდეს და მის აღზრდა-განათლებაზე მოჩვენებები არ ზრუნავდნენ. აბა რა უნდა ქნა, როცა ცოცხალთა სამყარო მოკვლით გემუქრება? არც სასაფლაოზეა ვინისთვის უცხო საფრთხე და თავგადასავლები, მაგრამ იქ არ უშვებენ კაცს, სახელად ჯეკს, რომელმაც ადრე ვინის მშობლები ამოხოცა. ერთ-ერთი საუკეთესო თანამედროვე ავტორის, ნილ გეიმანის „სასაფლაოს წიგნი“ არ დატოვებს გულგრილს ფენტეზისა და თავგადასავლების მოყვარულ მკითხველს, და არა მხოლოდ მათ.

2. უიღბლო ამბების სერია – ლემონი სნიკეტი

ლემონი სნიკეტი თანამედროვე ამერიკელი მწერლის - დენიელ ჰენდლერის - ფსევდონიმია. დენიელ ჰენდლერმა სწორედ ამ სერიით გაითქვა სახელი. უიღბლო ამბების სერიას კრიტიკოსები ასე ახასიათებენ: ესაა შავი იუმორის, ვიქტორიანული გოთიკისა და სარკასტული თხრობის ნაზავი. პოსტმოდერნისტული ლიტერატურისა და მეტაპროზის საუკეთესო მაგალითი. ტექსტი სავსეა კულტურული თუ ლიტერატურული ალუზიებით და საინტერესო საკითხავია ყველა ასაკის მკითხველისათვის. უიღბლო ამბების მიხედვით ნეტფლიქსმა ახალი სერიალი გადაიღო. მისი პირველი სეზონი 2017 წელს გამოვიდა. ამჟამად ქართულად ამ სერიის ოთხი წიგნია თარგმნილი: ცუდი დასაწყისი, ტერარიუმი, ქარიშხალი და საზარელი სამხერხაო.

3. დრაკულა – გრაფიკული რომანი / კომიქსი

ტრანსილვანიის მაღალ მთებში ბოროტი გრაფი დრაკულა ცხოვრობს. მის სასახლეში სტუმრობისას ჯონათან ჰარკერი შემთხვევით შეიტყობს გრაფის საშინელი გეგმის – მკვდართა არმიის შექმნის შესახებ. შეძლებს ვამპირებზე მონადირე პროფესორი ვან ჰელსინგი ჯონათანისა და მისი მეგობრების დახმარებას და დრაკულას გეგმის ჩაშლას, თუ უკვე გვიანია? ჯონათანისა და დრაკულას სისხლის გამყინავ ისტორიას ამ შთამბეჭდავი გრაფიკული რომანის საშუალებით შეიტყობ. საინტერესო და სხარტი დიალოგებით მოთხრობილი კლასიკური სიუჟეტი ნებისმიერი ბავშვის ყურადღებას მიიპყრობს, ილუსტრაციები კი ბავშვებს ნაწარმოებების შინაარსის აღქმას გაუმარტივებს. ეს გრაფიკული რომანი საუკეთესო არჩევანია ჰელოუინის აღსანიშნად.

4. კორალაინი – ნილ გეიმანი

ვისაც ხიბლავს იდუმალებით მოცული, ჯადოსნური თავგადასავლები და, ზოგადად, ფენტეზის ჟანრის ნაწარმოებები, აუცილებლად უნდა წაიკითხოს თანამედროვე ბრიტანელი მწერლის, გრაფიკული რომანებისა და კომიქსების ავტორის, ნილ გეიმანის ბესტსელერი „კორალაინი“, რომელიც უკვე რამდენიმე პრესტიჟული ლიტერატურული პრემიით დაჯილდოვდა. ქართულ ენაზე პირველად გამოცემული „კორალაინი“ შეიძლება თქვენთვის შეუცვლელი თანამგზავრი აღმოჩნდეს საიდუმლო კარს მიღმა არსებულ მომიჯნავე ქვეყანაში, რომელიც მხოლოდ ერთი შეხედვით წააგავს ნამდვილს.