MIT-ის სტუდენტებმა, ეიბ დევისმა, ჯასტინ ჩენმა და ნილ ვადვამ, თავიანთი სადოქტორო დისერტაციისთვის ინტერაქტიული დინამიური ვიდეოს ტექნოლოგია შეიმუშავეს.

ახალი ტექნოლოგია ვიდეოში აღბეჭდილი ვიბრაციის მიხედვით ადგენს, როგორ შეიძლება კონკრეტულმა ობიექტმა მასთან სხვადასხვა კუთხიდან შეხებისას იმოძრაოს. რაც შესაძლებელს ხდის ვიდეოში აღბეჭდილ ობიექტთან ვირტუალურ ინტერაქციას.

ვიდეოს გადაღების შემდეგ ობიექტის ვიბრაციის სახეების დადგენა ხდება. ყოველი ასეთი სახე ობიექტის სხვადასხვაგვარ მოძრაობას განსაზღვრავს. ვიბრაციის სახეებისა და სიხშირის დადგენის შემდეგ, შესაძლებელია იმის განსაზღვრა, თუ როგორ იმოძრავებს ობიექტი მასზე ზემოქმედების შემთხვევაში. ტექნოლოგია იმ შემთხვევაშიც მუშაობს, თუ ობიექტის სამ განზომილებიანი ფორმა ვიდეოზე არ ასახულა.

ეიბ დევისი ვიდეოში ამბობს, რომ ამ ტექნოლოგიის გამოყენება საინჟინრო აპლიკაციებში შეიძლება, რათა განისაზღვროს ამა თუ იმ შენობის მდგრადობა და უსაფრთხოება.

ტექნოლოგიის გამოყენება ჰოლივუდშიც შეიძლება. როგორც ვიდეოშია აღწერილი, როდესაც ფილმში CGI (კომპიუტერის მიერ გენერირებული გამოსახულება) პერსონაჟი ჩანს, საჭიროა მისი ინტერაქცია გარემოსთან.

მაგალითად, ვიდეოში ნაჩვენები ტირანოზავრი, რომელიც ჯუნგლებში მორბის, 3D ობიექტია და იმისთვის, რომ ფოთლებისა და ხეების ზანზარი და შრიალი გამოჩნდეს, რადგან გარემო გაშეშებული არ იყოს, დინოზავრთან ერთად, გრაფიკოსები მცენარეების ვირტუალურ ვერსიებსაც ამატებენ მონტაჟისას. ეს ტექნიკა დღევანდელ ჰოლივუდიში ხშირად გვხვდება, მაგრამ მისი ხარისხიანად გაკეთება ძალიან ძვირია - ყოველი ახალი ვირტუალური ობიექტი კარგად დახატული უნდა იყოს და ყველა მათგანის ამოძრავება სათითაოდაა საჭირო.

MIT-ს ტექნოლოგიის უპირატესობა ამ ტექნოლოგიის მიმართ შეგიძლიათ ვიდეოში იხილოთ და ნახოთ, როგორ ბუნებრივად აზანზარებს ცუდად დახატული გოდზილა მის გარშემო არსებულ ობიექტებს.

ტექნოლოგია MIT-ს მიერაა დაპატენტებული და ლიცენზიის ავტორებს მათი საიტიდან შეგიძლიათ დაუკავშირდეთ.