ჩნდება საფუძვლიანი ეჭვი, რომ ქვეყანაში ელიტური კორუფცია და არაფორმალური მმართველობაა — ამის შესახებ სამართლიანი არჩევნების წინასაარჩევნო პერიოდის მონიტორინგის შუალედურ ანგარიშშია ნათქვამი, რომელიც 2018 წლის 9-დან 30 სექტემბრამდე პერიოდს მოიცავს.

სამართლიანი არჩევნები მედიაში ფარული ჩანაწერების გავრცელებაზე წერს, რომლებიც ხელისუფლების მოქმედ და ყოფილ მაღალჩინოსნებს სავარაუდო კორუფციულ გარიგებებში ამხელს და საარჩევნოდ მმართველი პარტიის სავარაუდო დაფინანსების არალეგალურ სქემას ააშკარავებს.

"გავრცელებული აუდიოჩანაწერების შინაარსი კითხვის ნიშნის ქვეშ აყენებს საქართველოს საარჩევნო სისტემაში პოლიტიკური დაფინანსების კანონმდებლობის ეფექტურობას. ჩანაწერების ავთენტურობისა და მათში მოყვანილი ფაქტების უტყუარობის შემთხვევაში, იკვეთება, რომ შესაბამისი სახელმწიფო ინსტიტუტები და საკანონმდებლო ბაზა უძლურია წინ აღუდგეს პოლიტიკაში უკანონო ფულადი სახსრების მობილიზებისა და ხარჯვის პრაქტიკას", — ნათქვამია მონიტორინგის ანგარიშში.

სამართლიანი არჩევნების შეფასებით, გარდა აღნიშნული ჩანაწერებისა, 29-30 სექტემბერს გავრცელებული ჩანაწერები და რუსთავი 2-ის ეთერში გასული ზაზა ოქუაშვილის ინტერვიუ სხვა სერიოზული დანაშაულებრივი ქმედებების შესახებ ავლენს ინფორმაციას.

აუდიოჩანაწერების შინაარსიდან იკვეთება კორუფციული დანაშაულების სისტემური ნიშნები, რომელშიც სხვადასხვა მაღალი თანამდებობის პირი და სახელმწიფო ინსტიტუტი მონაწილეობს. ასევე, ჩანაწერების შინაარსი მიუთითებს, რომ საჯარო ინსტიტუტები ცალკეული პირების არაფორმალური გავლენებს არიან დაქვემდებარებული", - ვკითხულობთ ანგარიშში.

ორგანიზაციის ცნობით, გავრცელებული ჩანაწერები და ამ ჩანაწერებთან დაკავშირებით მიმდინარე პროცესევბი კითხვის ნიშნის ქვეშ აყენებს მათ ავთენტურობას და მათში გამჟღავნებული მძიმე დანაშაულებების შესახებ გამოძიების ეფექტურობას.

ომეგა ჯგუფის საქმე

საქართველოს მთავარი პროკურატურის განცხადებით, ომეგა ჯგუფის საქმეზე მედიაში გავრცელებული აუდიოჩანაწერები ავთენტური არაა და დამონტაჟებულია. სამხარაულის სახელობის ექსპერტიზის ეროვნულმა ბიურომ დასკვნა 4 ოქტომბერს გასცა.

10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი, ლევან ყიფიანი და ომეგა ჯგუფის დამფუძნებელს, ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.

რუსთავი 2-მა გაავრცელა ასევე "სარდაფის ეპიზოდის" აუდიოჩანაწერიც. ტელეკომპანიის ინფორმაციით, სავარაუდოდ, ყოფილი პროკურორი ოთარ ფარცხალაძე სპორტის ყოფილ მინისტრს ლევან ყიფიანს გაუპატიურებით ემუქრებოდა და მას ფიზიკურად ერთ-ერთ სარდაფში გაუსწორდა.

ომეგა ჯგუფის საქმის ჩანაწერებზე ლევან ყიფიანი სასამართლოში 3 ოქტომბერს გამოიკითხა. სასამართლოში გამოკითხვის შემდეგ ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელმა, ზაზა ოქუაშვილმა მასთან შეთანხმებით ჩაწერა.

მისი თქმით, ამ ჩანაწერებზე დათანხმების მიზანი იყო, რომ ოქუაშვილს საქართველოში და საზღვარგარეთ ფინანსური პრობლემები მოეგვარებინა. მისი განმარტებით, ჩანაწერებით უცხოელი პარტნიორები სახელმწიფოს მიერ ომეგა ჯგუფზე ზეწოლის შესახებ შეიტყობდნენ, ოქუაშვილი კი ამ დროს საქართველოში ბიუჯეტის მიმართ არსებულ დავალიანების საკითხსაც გადაჭრიდა. თუმცა როგორც ყიფიანი განმარტავს, ის აუდიოჩანაწერები, რომელიც მედიით გავრცელდა დამონტაჟებულია.

ლევან ყიფიანის ადვოკატის განცხადებით, ისინი გეგმავენ, რომ ოქუაშვილს სასამართლოში უჩივლონ.