მეცნიერებმა გალაქტიკათშორის პარაზიტებთან ბრძოლის ახალი მეთოდი შეიმუშავეს. ეს ისეთი პარაზიტებია, რომლებიც მსხვერპლის ტვინში მცდარი ისტორიების ჩაშენებას ახდენენ და მის მეხსიერებას თავდაყირა აყენებენ. ახალი მეთოდი ჯერჯერობით მხოლოდ ზირგიონის სიმულაციაში მუშაობს. კვლევა რამდენიმე სამეცნიერო ჟურნალში გამოქვეყნდა, მისი ავტორი კი ცნობილი მეცნიერი ბეთ სმიტია.

ეს ყველაფერი, რა თქმა უნდა, სრული სისულელეა.

ბეთ სმიტს, ზირგიონის სიმულაციასა და გალაქტიკათშორისი პარაზიტებს მხოლოდ რიკი და მორტი-ში თუ შეხვდებით, სამეცნიერო ნაშრომი კი რა თქმა უნდა ტროლია. სამწუხარო ფაქტი ის არის, რომ ამ ყველაფრის მიუხედავად აღნიშნული ნაშრომი სამ სამეცნიერო ჟურნალში მაინც გამოქვეყნდა.

"სამეცნიერო" სტატია ერთ-ერთმა ინდოელმა სტუდენტმა შექმნა, რათა დღევანდელ სამყაროში ცრუ ინფორმაციის გავრცელების პრობლემაზე ხაზი გაესვა.

არსებობს უამრავი სამეცნიერო ჟურნალი, რომელსაც კარგი რეპუტაცია გააჩნია, თუმცა ამავდროულად არსებობს ძალიან ბევრი ჟურნალი, რომელიც ფულის სანაცვლოდ ნებისმიერი ნაშრომის გამოსაქვეყნებლად არის მზად.

"ცრუ მეცნიერების გავრცელება ძალიან ფართო მასშტაბებს აღწევს და მე ვცადე, რომ ამ საკითხზე რაიმე მომემოქმედებინა. ამ ყველაფერში ბევრი ფულია გარეული და ასეთი ჟურნალები უფრო და უფრო ძლიერდებიან, ეს კი მეცნიერებას დიდ საფრთხეს უქმნის," - აცხადებს კვლევის ავტორი.

სტუდენტმა საკუთარი კვლევა 14 სხვადასხვა სამეცნიერო ჟურნალს გაუგზავნა. სამმა მათგანმა კვლევა დაუყოვნებლივ გამოაქვეყნა, ხუთმა კი მას თანხის გადახდა მოსთხოვა. სამმა ჟურნალმა ნაშრომი ხუმრობად ჩათვალა და სწრაფადვე უარყო.

"სამყაროში, სადაც ცრუ ინფორმაციის გავრცელება ყველას შეუძლია ძალიან მნიშვნელოვანია, რომ მკითხველებმა ინფორმაციის წყარო და სანდოობა მუდმივად ამოწმონ," - აცხადებს კვლევის ავტორი.