აშშ-ში მოღვაწე ქართველმა მომღერალმა ნინი ბრეგვაძემ, რომელსაც სასცენო სახელით Nini Iris იცნობენ, ახალი სინგლი Release Me (ინგლ. "გამიშვი") გამოუშვა. ეს სწორედ ის სიმღერაა, რომლითაც ნინის 2025 წლის ევროვიზიაზე საქართველოს წარდგენა სურდა. მუსიკოსმა კომპოზიცია საზოგადოებრივ მაუწყებელს გაუგზავნა, მაგრამ არხმა კიდევ ათობით სხვა კანდიდატურას შორის არჩევანი მარიამ შენგელიაზე შეაჩერა, რომელიც წლევანდელ ევროფესტივალზე სიმღერით Freedom წარდგება.

რაც შეეხება Release Me-ს, ნინიმ სიმღერის გამოსვლა მარტში დააანონსა. ქართველმა მუსიკოსმა მაშინ მოკლე ვიდეომიმართვაც გაავრცელა და კომპოზიციის მნიშვნელობა ახსნა — გულგატეხილობის დაძლევაზეაო.

ნინიმ თავის ფანებს იანვარში შეატყობინა, რომ წლევანდელ ევროფესტივალზე საქართველოს სახელით მონაწილეობა სურდა. იგი კონკურსის ქართველი გულშემატკივრების მთავარ ფავორიტადაც მოიაზრებოდა. მომღერლის თქმით, როცა სიმღერა საზმაუს გაუგზავნა, მათ ასევე აცნობა, რომ მზად იყო, სხვა კომპოზიცია დაეწერა ან მიმართულება შეეცვალა.

• "შედეგი ისეთი არ აღმოჩნდა, როგორსაც ველოდი" — Nini Iris ევროვიზიაზე მიმართვას ავრცელებს

პირველი არხის შერჩეული საევროვიზიო სიმღერა კი ფანების რეიტინგში ამ დრომდე ბოლო, 37-ე ადგილს იკავებს. არცთუ სახარბიელო პროგნოზი აქვთ ბუქმეიკერებსაც — მარიამ შენგელია მეორე ნახევარფინალის მონაწილეებს შორის აქაც ბოლო პოზიციაზეა ფინალში გადასვლის მხოლოდ 17%-იანი შანსით.

• მოისმინეთ სიმღერა, რომლითაც საქართველო ევროვიზია 2025-ზე წარდგება (ვიდეო)
• როგორ შეირჩა საქართველოს საევროვიზიო სიმღერა და ვინაა მისი ავტორი

Nini Iris-ის წარმატების გზა

Nini Iris მსოფლიო მასშტაბით 2023 წელს გაიცნეს, როცა მან ამერიკულ ვოისში მიიღო მონაწილეობა. "ბრმა ქასთინგზე" სიმღერის შესრულების შემდეგ, ნინის ოთხივე მწვრთნელი ოვაციებით შემოუტრიალდა. ირლანდიელმა პოპვარსკვლავმა ნაილ ჰორანმა, რომელიც ნინიმ მოგვიანებით თავის მენტორად აირჩია, ქართველ მუსიკოსს "პოტენციური გამარჯვებული" უწოდა. Nini Iris პროექტს ნახევარფინალიდან გამოეთიშა, მაგრამ მან ამერიკელი ტელემაყურებლის დიდი მხარდაჭერა დაიმსახურა.

• მოუსმინეთ Nini Iris-ის შესრულებას ამერიკული The Voice-ის ნახევარფინალში

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. მუსიკოსის თქმით, უცხო ქვეყანაში თავის დასამკვიდრებლად გრძელი და რთული გზა გაიარა.

მანამდე, 2015 წელს, 18 წლის მომღერალი ქართული X ფაქტორის მეორე სეზონში გამოჩნდა და კონკურსის ფინალისტიც გახდა. გამორჩეული ვოკალური შესაძლებლობების მქონე მუსიკოსმა, რომელიც, ამავდროულად, ცეკვავდა და რეპავდა, მეგაშოუს ჟიური და მაყურებელი ერთნაირად აღაფრთოვანა.

Release Me-ს გარდა, ნინის გამოშვებული აქვს სამი სინგლი: Rhythm Of My Heartbeat (2019), Fade Away (2022) და Psycho (2024).