მედიცინაში 2018 წლის ნობელის პრემია ამერიკელმა ჯეიმს ალისონმა და იაპონელმა ტასუკუ ჰონჯომ კიბოს მკურნალობაში მიღწეული პროგრესისთვის მიიღეს. ინფორმაციას BBC ავრცელებს.

ორმა მეცნიერმა ნობელის პრემია კიბოს მკურნალობის ახალი მეთოდების აღმოჩენისთვის მიიღო. მათ დაადგინეს, რომ კიბოსთან საბრძოლველად ორგანიზმის იმუნური სისტემის უჯრედების გამოყენებაა შესაძლებელი.

ამ აღმოჩენის მეშვეობით მეცნიერებმა კიბოს მკურნალობის ახალი მეთოდები შეიმუშავეს - შექმნეს წამლები, რომლებიც იმუნურ სისტემას კიბოს უჯრედების აღმოჩენისა და განადგურების საშუალებას აძლევს.

მიუხედავად ძლიერი გვერდითი ეფექტებისა ახალი მედიკამენტების ეფექტურობა კიბოს ისეთ ფორმებზეც დადასტურდა, რომლის მკურნალობის მეთოდებიც აქამდე არ არსებობდა.

"ალისონისა და ჰონჯოს აღმოჩენების საშუალებით ბოლო ათწლეულში სიმსივნის მკურნალობის სრულად ახალი მეთოდები მივიღეთ. ათი წლის წინ მეტასტაზური მელანომა ფაქტობრივად უკურნებელი დაავადება იყო. ახლა კი ჩვენ მასთან ბრძოლის საშუალებები გაგვაჩნია, ამან კი უამრავი პაციენტის მდგომარეობა გააუმჯობესა," - ამბობენ მეცნიერები.