ინსტაგრამის თანადამფუძნებლებმა, კევინ სისტრომმა და მაიკ კრიგერმა თანამდებობა დატოვეს. სისტრომმა, რომელიც ინსტაგრამის მთავარი აღმასრულებელი დირექტორის პოზიციას იკავებდა, განაცხადა, რომ ის და კრიგერი ცნობისმოყვარეობისა და კრეატიული იდეების სხვა სფეროში მონისჯვას აპირებენ.

2012 წელს, ფეისბუქმა ინსტაგრამი 1 მილიარდ დოლარად შეიძინა. ფოტოების გასაზიარებელ მობილურ აპლიკაციას, ამ დროისთვის, მილიარდზე მეტი მომხმარებელი ჰყავს. თავად კრიგერმა და სისტრომმა, ინსტაგრამი 2010 წელს დააფუძნეს.

უცხოურ მედიაში გავრცელებული ინფორმაციით, კრიგერსა და სისტრომს ფეისბუქთან ურთიერთობა დაეძაბა, თუმცა, როგორც ცნობილია, ფეისბუქის ხელმძღვანელობისთვის მათი გადაწყვეტილება მოულოდნელი იყო.

"მზად ვართ, ახალ საფეხურზე გადავიდეთ. სიახლეების შესაქმნელად აუცილებელია უკან დაიხიო, ჩაუღრმავდე შენს ინტერესებს და შემდეგ ეს მსოფლიო მოთხოვნებს შეუსაბამო. სწორედ ამის გაკეთებას ვაპირებთ ჩვენ", - დაწერა სისტრომმა ინსტაგრამის ბლოგზე და დასძინა, რომ ფეისბუქისა და ინსტაგრამის მომავალი მათთვის კვლავ მნიშვნელოვანია. წყვილმა განცხადება ტვიტერზეც გაავრცელა.

ფეისბუქის აღმასრულებელმა დირექტორმა მარკ ცუკერბერგმა სისტრომსა და კრიგერს ნიჭიერი ადამიანები უწოდა:

"ბოლო 6 წლის განმავლობაში, მათთან ერთად მუშაობამ ბევრი რამ მასწავლა და ეს სასიამოვნო გამოცდილება იყო. ინტერესით დავაკვირდები, რას შექმნიან მომავალში".

რა შეიძლება იდგეს კრიგერისა და სისტრომის გადაწყვეტილების უკან?

უცხოური მედია ბოლო პერიოდში წერდა უთანხმოებაზე, რომელიც ფეისბუქის ხელმძღვანელობასა და ინსტაგრამის დამფუძნებლებს შორის არსებობდა. ინსტაგრამი უფრო და უფრო პოპულარული ხდებოდა, მაშინ, როცა ფეისბუქის მოხმარება ისეთივე წარმატებით აღარ იზრდებოდა.

აქედან გამომდინარე, ფეისბუქი ცდილობდა მომხმარებლებისგან მეტი ფულის მოზიდვასა და ახალი ფუნქციების დამატებას, რაც ინსტაგრამის სიმარტივის იდეას ეწინააღმდეგებოდა.

ინსტაგრამის უახლესი პროდუქტი IGTV, რომელიც მომხმარებლებს გრძელი ვიდეოების ატვირთვის საშუალებას აძლევს და იუთუბს კონკურენციას უწესებს, სექტემბერში მკაცრად გააკრიტიკეს, რადგან ის მომხმარებლებს ბავშვების მონაწილეობით სექსუალური შინაარსის ვიდეოებს ურჩევდა.

2018 წლის დასაწყისში, ფეისბუქი სკანდალში მისი მომხმრებლების ინფორმაციის გაჟონვის გამო გაეხვა. 2014 წელს ფეისბუქზე გამოჩნდა ქვიზი, სახელად this is your digital life, რომელიც ადამიანებს სთავაზობდა მათი პერსონალური ტიპის დადგენას. აპლიკაცია კემბრიჯის უნივერსიტეტის აკადემიკოსის, ალექსანდრ კოგანის მიერ იყო შექმნილი (უნივერსიტეტს კემბრიჯ ანალიტიკასთან არაფერი აკავშირებს). აპლიკაცია მონაცემებს არა მხოლოდ ქვიზში მონაწილე ადამიანების, არამედ მათი მეგობრების შესახებაც აგროვებდა. ამ გზით, კომპანიამ 50 მილიონზე მეტი მომხმარებლის ინფორმაციის მოპოვება შეძლო.

გაიგეთ მეტი: