დიდი ალბათობით თქვენი კომპიუტერის კლავიატურა ბევრად უფრო ბინძურია, ვიდრე უნიტაზის ზედაპირი.

არსებული მონაცემებით, უნიტაზის ზედაპირის 2.5 კვადრატულ სანტიმეტრზე დაახლოებით 50 ბაქტერიაა, რაც საკმაოდ დაბალი მაჩვენებელია. შედარებისთვის, ტიპურ კომპიუტერის მაგიდაზე დაახლოებით 400-ჯერ მეტი ბაქტერიის პოვნაა შესაძლებელი.

კლავიატურის ბაქტერიებით დაბინძურება განსაკუთრებით იმ შემთხვევებშია სავალალო, როდესაც კომპიუტერს მრავალი სხვადასხვა ადამიანი იყენებს.

ჩიკაგოს ერთ-ერთ საავადმყოფოში კლავიატურებზე ანტიბიოტიკებისადმი რეზისტენტული სტაფილოკოკიც აღმოაჩინეს. მსგავსი კვლევა ჰოლანდიაშიც ჩატარდა და ამ შემთხვევაში მათ კლავიატურების 95 პროცენტზე სტრეპტოკოკი, სტაფილოკოკი და სხვა პათოგენები იპოვეს.

ჩვენ ხშირად კომპიუტერებთან ვჭამთ, ვსვამთ, ვაცემინებთ, ვლაპარაკობთ, ვიცინით და ამ ყველაფრის გათვალისწინებით კლავიატურაზე ბაქტერიების პოვნა გასაკვირი სულაც არ არის.

რა სიხშირით უნდა გავწმინდოთ კლავიატურა?

მიკრობიოლოგების უმეტესობა თანხმდება, რომ კლავიატურა და კომპიუტერის მაგიდა კვირაში ერთხელ მაინც უნდა გაიწმინდოს. ჯანმრთელობის კვლევის ეროვნული ცენტრი კი აცხადებს, რომ საავადმყოფოებში არსებული კლავიატურები დღეში ერთხელ მაინც უნდა გასუფთავდეს. ამასთან ერთად ისინი ხელების ხშირი დაბანის აუცილებლობაზეც აკეთებენ აქცენტს. განსაკუთრებით კი მაშინ, როდესაც ერთ კომპიუტერს რამდენიმე სხვადასხვა ადამიანი იყენებს.

ხოლო თუ რომელიმე კონკრეტულ კომპიუტერს მხოლოდ თქვენ იყენებთ და მასთან შეხება სხვას არავის აქვს, ამ შემთხვევაში მისი დაბინძურების რისკი შედარებით ნაკლებია.

როგორ გავწმინდოთ კლავიატურა?

ეს საკმაოდ მარტივია.

პირველ რიგში კომპიუტერი დენის წყაროდან უნდა გამორთოთ. შემდეგ შეკუმშული ჰაერით, ან უბრალო ფენით კლავიატურას ნაფხვენები მოაშოროთ.

სისუფთავის ექსპერტი მელისა მეიქერი გვირჩევს, რომ ღილაკების საწმენდად თანაბარი რაოდენობით გაზავებული სპირტი და წყალი ვიხმაროთ. ღილაკებს შორის შესაღწევად კი ბამბის ჩხირების გამოყენება შეგვიძლია.

კლავიატურის წმენდისას კარგი იქნება თუ თქვენს სმარტფონსაც არ დაივიწყებთ. ტელეფონებს ჩვენ ყოველდღიურად ვიყენებთ და მასზე ხშირად ისეთი საშიში პათოგენების პოვნაა შესაძლებელი, როგორიც მაგალითად ეშერიხია კოლია. ამიტომ სასურველია, რომ დღის ბოლოს თქვენი სმარტფონი რეგულარულად გაწმინდოთ.