ვაშაძე-ჯაფარიძე-ახალი არჩევანი - დღეს, ლისის ტბაზე ახალი პოლიტიკური ბლოკის პრეზენტაცია გაიმართა.

ფოტო: თორნიკე მანდარია/on.ge

გირჩის ლიდერი, ზურაბ ჯაფარიძე On.ge-სთან საუბარში ამბობს, რომ მათ პროდასავლური ხმების დაკარგვის საფრთხე დაინახეს, ამიტომ გაუჩნდათ "პროდასავლური ძალების" გაერთიანების იდეა, თუმცა მისივე თქმით ეს იდეა კონკრეტულად არავის ეკუთვნის:

"ერთი მხრივ არსებული პოლიტიკური ძალები, რომლებიც თავს წარმოაჩენენ პროდასავლურ პოლიტიკურ ძალებად ვერ ახერხებენ მოსახლეობის გულის მოგებას, მეორე მხრივ კი პრორუსული ძალები ძალიან აქტიურდებიან. ჩვენი იდეა არ ყოფილა, გვქონდა გადაკვეთა, მაგალითად ვაშაძეს პარლამენტში ვხვდებოდით, ვსაუბრობდით და თავისთავად, ბუნებრივად გაჩნდა ეს იდეა".

ჯაფარიძე ასევე ამატებს, რომ თუ ვინმეს სურვილი ექნება, გაერთიანდეს პროდასავლური ღირებულებების მქონე დიდ ბლოკში, საბოლოო ჯამში ეს ქვეყნისათვის კარგი იქნება.

გაერთიანების კიდევ ერთი მიზეზი, ჯაფარიძის თქმით, არაკონკურენტული პირობებია:

"ჩვენი პარტია, ახალი პოლიტიკური ცენტრი-გირჩი, არის ახალი, ისევე როგორც ვაშაძის პარტია. ჩვენ ვართ არაკონკურენტულ პირობებში სახელისუფლებო პარტიებთან, დღევანდელთანაც და წინასთანაც. მათ აქვთ გაცილებით მეტი ფინანსური რესურსი კერძო შემომწირველების სახით, აქვთ სახელმწიფო დაფინანსება, უფასო სარეკლამო დრო და კიდევ ბევრი რამ, რაც ჩვენ არ გვაქვს. ამიტომ დისკუსია ჩვენს შორის შეეხო იმასაც, რომ იქნებ ამ რესურსების გაერთიანებით გაცილებით უფრო დიდ და გავლენიან ძალად ჩამოვყალიბდეთ."

ზურაბ ჯაფარიძე ამბობს, რომ სამივე სუბიექტს აქვს სურვილი, გაერთიანება იყოს გრძელვადიანი და არა მხოლოდ ამ არჩევნებისთვის:

"გვინდა ადამიანებს გავუჩინოთ იმედი, რომ არსებობს ალტერნატივა, მესამე, რეალური და არ არის აუცილებელი, რომ მაინც და მაინც ან დღევანდელ ხელისუფლებას მისცენ ხმა, ან წინა ხელისუფლებას."

გიორგი ვაშაძის განცხადებით, ახალი მემარჯვენეების, ახალი პოლიტიკური ცენტრი-გირჩისა და ახალი საქართველოს პოლიტიკურ ბლოკში გაერთიანებით, საქართველოს მოქალაქეებს სრულიად ახალ პერსპექტივას სთავაზობენ.

მამუკა კაციტაძის თქმით, იმისათვის რომ პოლიტიკაში იყო გავლენიანი აქტორი, ერთი მხრივ, საჭიროა შესაძლებლობებისა და რესურსების კონსოლიდაცია, მეორე მხრივ, კი მყარ იდეოლოგიაზე დაფუძნებული ფუნდამენტი:

"განვლილი 15 წლის განმავლობაში ახალი მემარჯვენეები არა ერთ პოლიტიკურ თუ საარჩევნო ბლოკში ვყოფილვართ, მაგრამ გულწრფელად მინდა გითხრათ, რომ მსგავსი თანხვედრა იდეოლოგიისა, ღირებულებებისა და ფასეულობებისა, საგარეო პოლიტიკური კურსისა, ეკონომიკური პოლიტიკისა, განვითარებაზე და განახლებაზე აქცენტის გაკეთებისა არ ყოფილა სხვა შემთხვევაში".