ჰოლანდიაში ექსპერიმენტმა, რომელსაც ორსულობის მიმდინარეობაზე ვიაგრას შესაძლო დადებითი ეფექტები უნდა შეესწავლა, 11 ჩვილის სიკვდილი გამოიწვია. მეცნიერები ცდილობდნენ, შეემოწმებინათ შეეძლო თუ არა სილდენაფილს, წამალს, რომელიც ვიაგრას სახელით არის ცნობილი საშვილოსნოში ბავშვის ზრდაზე დადებითი გავლენის მოხდენა.

კვლევა ჰოლანდიის 11 სხვადასხვა საავადმყოფოში მიმდინარეობდა.

ვიაგრა სისხლძარღვებს აფართოებს და ის მამაკაცებში ერექციის პრობლემების სამკურნალოდ გამოიყენება. მეცნიერების აზრით, ვიაგრას საშვილოსნოს სისხლის მიმოქცევა უნდა გაეუმჯობესებინა, რაც ჩანასახის ზრდას ხელს შეუწყობდა.

ექსპერიმენტში მონაწილე ქალებს საშვილოსნოში სისხლის მიმოქცევის პრობლემები ჰქონდათ, ამის გამო მათი ჩვილების გადარჩენის შანსი მცირე იყო.

კვლევის მიმდინარეობისას მაკონტროლებელმა კომიტეტმა აღმოაჩინა, რომ ფილტვების პრობლემებით იმაზე მეტი ბავშვი იბადებოდა, ვიდრე სავარაუდო იყო და ექსპერიმენტი სასწრაფოდ შეჩერდა.

პროცესის მიმდინარეობისას ვიაგრა ჯამში 93-მა ქალმა მიიღო. ფილტვების პრობლემები კი 17 ბავშვს აღმოაჩნდა და მათგან 11 გარდაიცვალა. დამატებით, ექსპერიმენტისგან დამოუკიდებლად ჯანმრთელობის სხვა პრობლემებით კიდევ 8 ბავშვი დაიღუპა.

ასევე არსებობდა 90 ქალისგან შემდგარი საკონტროლო ჯგუფი, რომლებმაც ვიაგრას ნაცვლად პლაცებო ტაბლეტი მიიღეს. ამ ჯგუფიდან ფილტვის პრობლემებით მხოლოდ სამი ბავშვი დაიბადა. კვლევისგან დამოუკიდებელი მიზეზებით კი ამ ჯგუფში 9 ბავშვი დაიღუპა.

სავარაუდოა, რომ წამალმა ჩვილების ფილტვებში სისხლის წნევის აწევა გამოიწვია, რამაც მათ ჟანგბადის მიწოდება შეუზღუდა.

უესელი აცხადებს, რომ ექიმებს ჰქონიათ გამოცდილება, როდესაც ვიაგრამ ორსულობაზე დადებითად იმოქმედა.

"ჩვენ ვცდილობდით დაგვემტკიცებინა, რომ სილდენაფილს ნაყოფის ზრდაზე კარგი გავლენა აქვს, თუმცა საპირისპირო შედეგი მივიღეთ, რაც შოკისმომგვრელია," - აცხადებს გინეკოლოგი უესელ გენსვორტი. კვლევის ფარგლებში წამლის არანაირი პოზიტიური გავლენა არ გამოვლენილა. უესელი აცხადებს, რომ ექიმებს ჰქონიათ შემთხვევები, როდესაც ვიაგრამ ნაყოფზე დადებითად იმოქმედა.

"ჰოლანდიაში ექიმები განსაკუთრებული სიფრთხილით გამოირჩევიან. წამლის პრაქტიკაში დანერგვამდე ის მრავალჯერ უნდა გამოიცადოს და შემოწმდეს. ამის აუცილებლობა ამ ექსპერიმენტშიც კარგად გამოჩნდა," - ამბობს კვლევის ავტორი უესელ გენსვორტი.