ამერიკული ონლაინ ჟურნალი Atlas Obscura აჭარული ხაჭაპურით დაინტერესდა. "ეს ყველიანი პური იმდენად პოპულარულია, რომ თბილისის სახელმწიფო უნივერსიტეტის ეკონომისტები მას საქართველოს ქალაქებში ცხოვრების ღირებულების ინდექსად იყენებენ", - წერს გამოცემა.

ამერიკული ჟურნალი იმასაც ხსნის, თუ როგორ აკეთებენ ეკონომისტები ამას:

"ისინი ოჯახის შემოსავალს ე.წ. ხ-ინდექსზე ყოფენ, რაც გულისხმობს აჭარული ხაჭაპურის მოსამზადებელი ინგრედიენტების ღირებულებას, ასევე იმ ენერგიის საფასურს [იქნება ეს გაზი თუ ელექტროენერგია], რაც მის მომზადებას სჭირდება. ასე იგებენ, რამდენი ცალი აჭარული ხაჭაპურის მომზადება შეუძლია საშუალოდ ერთ ოჯახს სხვადასხვა ქალაქში".

ატლას ობსკურა ყურადღებას ამახვილებს იმაზეც, რომ ხაჭაპური საქართველოს სხვადასხვა რეგიონებში სხვადასხვანაირად მზადდება:

"ის შეიძლება იყოს ორმაგი ქერქით, მრგვალი, ოვალური, ოთხკუთხედი, თავზე ყველით ან შიგნით ყველით. ხანდახან, ხაჭაპურებში მოხარშულ კარტოფილს ურევენ და ხანდახან კვერცხს ასხამენ".

გამოცემა კონკრეტულად აჭარული ხაჭაპურის ისტორიასაც ჰყვება და წერს, რომ მისი დამზადების ტრადიცია შავი ზღვის სანაპიროდან მოდის:

"ის სამ მნიშვნელოვან დეტალს მოიცავს: ღიაა, ნავის ფორმით, ცოცხალი კვერცხითა და კარაქის პატარა ნაჭერით".

გამოცემა მკითხველებს ასევე ასწავლის, როგორ უნდა მიირთვან აჭარული ხაჭაპური:

"ერთმანეთში აურიეთ კარაქი, დამდნარი ყველი და კვერცხის გული, შემდეგ მოტეხეთ პურის ნაწილი და "ნავში" ჩააგდეთ".

აჭარული ხაჭაპური ტურისტების ერთ-ერთი საყვარელი კერძია და მასზე ხშირად წერენ უცხოური გამოცემები. გაეცანით 5 შემთხვევას, როცა უცხოურმა გამოცემებმა ქართული ხაჭაპურის შესახებ დაწერეს.