6 ივლისს, რუსეთში მინიმუმ 393 ფრენა გაუქმდა ან გადაიდო. შეზღუდვებმა იმოქმედა მოსკოვის შერემეტიევოს, სანქტ-პეტერბურგის პულკოვოსა და ნიჟნი ნოვგოროდის ჩკალოვის (სტრიგინო) აეროპორტებზე. ამის შესახებ ინფორმაციას Deutsche Welle ავრცელებს.

ამას გარდა, ივანოვოს, კალუგის, ფსკოვის, ტამბოვისა და იაროსლავის აეროპორტებმა მუშაობა დროებით შეწყვიტეს. რუსეთის ტრანსპორტის სამინისტრომ და "როსავიაციამ" განაცხადა, რომ ეს ნაბიჯები "ფრენის უსაფრთხოების უზრუნველსაყოფად" გადადგეს.

მოსკოვის დროით 18:00 საათის მონაცემებით, შერემეტიევოში გაუქმდა 171 რეისი, ხოლო კიდევ 56 ფრენა ორ საათზე მეტით დაგვიანდა. პულკოვოში გაუქმდა 90 ფრენა და 37 — დაგვიანდა. ჩკალოვის აეროპორტში 26 ფრენა გაუქმდა და 13 დაგვიანდა — როსავიაციის თქმით, ყველაზე ხანგრძლივი შეზღუდვები სწორედ ნიჟნი ნოვგოროდის აეროპორტში მოქმედებდა.

შეგახსენებთ, რომ 5 ივლისსაც შერემეტიევოს, პულკოვოსა და ჩკალოვის აეროპორტებში 250-ზე მეტი ფრენა გაუქმდა და 270-ზე მეტი დაგვიანდა. გაზეთ "კომერსანტთან" ინტერვიუში სპეციალისტებმა აღნიშნეს, რომ ამ ორ დღეში რუსეთში ავიამიმოსვლის შეფერხება ავიაკომპანიებს შესაძლოა 20 მილიარდი რუბლი დაუჯდეთ.

6 ივლისს, რუსეთის თავდაცვის სამინისტრომ განაცხადა, რომ მოსკოვის დროით 14:20-დან 19:30 საათამდე, რუსეთის ჰაერსაწინააღმდეგო თავდაცვის სისტემებმა 48 უპილოტო საფრენი აპარატი ჩამოაგდეს რუსეთის რვა რეგიონში. მონაცემების მიხედვით, 13 დრონი განადგურდა კალუგის ოლქში, 10 — ბრიანსკის ოლქში, 9 — მოსკოვის ოლქში, 6-6 — ბელგოროდის და სმოლენსკის ოლქებში, 2 — ლენინგრადის ოლქში და 1-1 — კურსკისა და ნოვგოროდის ოლქებში.