Facebook მომხმარებლის ინფორმაციის დაუცველობის გამო ნახევარი მილიონი გირვანქა სტერლინგით დაჯარიმდა. გადაწყვეტილება დიდი ბრიტანეთის ინფორმაციული უსაფრთხოების სააგენტომ მას შემდეგ მიიღო, რაც გაირკვა, რომ Cambridge Analytica-მ ფეისბუქის მომხმარებლების ინფორმაცია უკანონოდ მოიპოვა, კომპანიამ კი ვერ დაიცვა. ამის შესახებ ინფორმაციას Financial Times ავრცელებს.

500 ათასი გირვანქა სტერლინგი ის მაქსიმალური ჯარიმაა, რომელიც დიდი ბრიტანეთის ინფორმაციული უსაფრთხოების კანონმდებლობით 1998 წელს განისაზღვა.

პირადი მონაცემების შესახებ ევროპული რეგლამენტი მსგავსს დარღვევაზე გაცილებით უფრო დიდ ჯარიმებს ითვალისწინებს და სანქციის მაქსიმუმი კომპანიის გლობალური მოგების 4 პროცენტით შეიძლება განისაზღვროს. მსგავსი რისკი Facebook-ის შემთხვევაშიც არსებობდა, თუმცა ახალი რეგლამენტი ამ სკანდალის შემდეგ მიიღეს და მასზე აღარ გავრცელდება.

2018 წლის მარტში გავრცელდა ინფორმაცია იმის შესახებ, რომ საკონსულტაციო ფირმა Cambridge Analytica უკანონოდ აგროვებდა სოციალური ქსელის Facebook-ის მომხმარებლების პირად ინფორმაციას. კომპანია ამ ინფორმაციას ამომრჩევლის პოლიტიკური პორტრეტის შესაქმნელად იყენებდა, Cambridge Analytica აქტიურად თანამშრომლობდა, დონალდ ტრამპის საარჩევნო შტაბთან, ასევე, ბრიტანეთის ევროკავშირიდან გასვლის მომხრე სხვადსხვა პოლიტიკურ ჯგუფებთან.

აღნიშნული თემა საერთაშორისო ყურადრების ცენტრში მარტში მოექცა, მათ შორის ამერიკის კონგრესში პირადად დაიკითხა Facebook-ის დამფუძნებელი მარჯ ცუკერბერგიც. სკანდალიდან ორი თვის შემდეგ Cambridge Analytica-მ საქმიანობის შეწყვეტის შესახებ გაავრცელა ინფორმაცია.

სკანდალის შემდეგ, Facebook-მა მნიშვნელოვნად შეამცირა სხვადასხვა აპლიკაციების წვდომა, მომხმარებლების პირად ინფორმაციაზე.