ჰავაის დიდი კუნძული დღითიდღე დიდდება. ვულკან კილაუადან წყნარ ოკეანეში ლავა ჩაედინება. კილაუა 1983 წლიდან აქტიური ვულკანია, თუმცა ლავას ოკეანემდე მიღწევის ფაქტი პირველად წელს დაფიქსირდა.

12 კმ სიგრძის ლავას ნაკადი მაისში დაიძრა და ოკეანემდე რამდენიმე დღის წინ მიაღწია. ამერიკის გეოლოგიური კვლევითი ცენტრის გაცხადებით, ზღვაში 20 მეტრის სიგანის ლავას ნაკადი ჩაედინება. წყალთან შეხებისას ცხელი მასა ქვავდება და დიდი რაოდენობით ორთქლი წარმოიქმნება. ეს სანახაობა ჰავაიზე ტურისტებს და მოლაშქრეებს კიდევ უფრო ზიდავს.

კანოა ჯონსი ჰავაიზე მექანიკოს-შემდუღებლად სრულ განაკვეთზე მუშაობს, თუმცა იგი დამატებით ტურისტებს კუნძულის გარშემო ნავით ატარებს. მის კომპანიას ამისათვის ოფიციალური ნებართვა აქვს.

"არიან ადამიანები, რომლებიც მთელი თვის განმავლობაში ეძებენ ნავს, რათა ლავის ოკეანეში ჩადინება ნახონ".

მისი თქმით, შეიძლება გაგიმართლოს და ლავასთან ახლოს მისვლის საშუალებაც მოგეცეს, თუმცა ის საშუალო დისტანციის დაჭერას ამჯობინებს. ხანდახან ლავას გადმოსვლა აფეთქებას იწვევს, ძირითადად კი მშვიდად მოედინება.

დევიდ ფორდი, რომელსაც ლავასთან ახლოს მისვლის საშუალება მიეცა ამბობს, რომ ლავას წყალთან შეხებისას ჰაერში ძლიერად იგრძნობა გოგირდის სუნი.

როგორც ამერიკის გეოლოგიური კვლევითი ცენტრი აცხადებს, ლავასთან მიახლოება სასიკვდილოდ საშიშია. ცენტრი არიგებს ბროშურებს, რომელშიც იმ სახიფათო ნივთიერებების ჩამონათვალია, რომლებიც კუნძულთანაა გავრცელებული.

მიუხედავად დიდი რაოდენობით მსურველებისა, კუნძულზე ლაშქრობა სასტიკად აკრძალულია.

2014 წლის ივნისში საფრთხე დაემუქრა სოფელ პაჰოას, თუმცა ამჯერად მიმდებარე დასახლებებს საფრთხე არ ემუქრებათ.