დღეს, 25 ივნისს ხორავას ქუჩის საქმეზე შემქნილი საგამოძიებო კომისიის სხდომაზე გაირკვა, რომ გამოძიების დროს ინციდენტში მონაწილე ყველა პირის სოციალური ქსელებიდან, ტელეფონებიდან და კომპიუტერიდან ინფორმაცია არ ამოუღიათ. ეს დეტალი მას შემდეგ გამოიკვეთა, რაც საგამოძიებო კომისიის წევრებმა საქმის გამომძიებელსა და პროკუროს კითხვები დაუსვეს.

კომისიის წევრმა, ირაკლი აბესაძემ პროკურორ ზვიად ფხაკაძეს ჰკითხა, ჩატარდა თუ არა ყველა საჭირო პროცედურა ინფორმაციის ამოსაღებად.

საქმის ზედამხედველი პროკურორის, ზვიად ფზაკაძის თქმით, საქმეში მონაწილე პირებს ტელეფონები არ ჩამოართვეს, ვინაიდან გამოძიებას ჰქონდა იმედი, რომ მათ შორის გაგრძელდებოდა კომუნიკაცია და მეტ ინფორმაციას მიიღებდნენ. ფხაკაძის თქმით, ამავე მიზეზით არ ჩატარდა მოწმეების და ბრალდებულების მიმართ ფარული საგამოძიებო მოქმედებები.

გარდა ამისა, პროკურორმა განაცხადა, რომ კონფლიქტში მონაწილე პირთა ნაწილს თან არ ჰქონდა ტელეფონი, ზოგიერთი არ სარგებლობდა, ზოგიერთი კი სხვადასხვა ნომერს იყენებდა. ამის დადგენა პირველ დღეებში გამოძიების მხრიდან იყო პრობლემური.

ირაკლი აბესაძემ განაცხადა, რომ უწყებამ ტელეფონები ამოიღო 16,17 და 21 დეკემბერს. მაშინ, როცა ა.ს-ს ტელეფონში გამოცვლილი ჰქონდა ბარათი და რამდენჯერმე ჰქონდა გადაყენებული ოპერაციული სისტემა.

ფაქტების შეჯერების შემდეგ კომისიის თავმჯდომარე სერგი კაპანაძემ გამომძიებელს ჰკითხა იყო თუ არა გამოძიების შეცდომა ის, რომ არასრულწლოვნებს არც შესთავაზეს ტელეფონების გაცემა, არც ფარული საგამოძიებო მოქმედებები ჩაატარეს და საბოლოოდ ვერ მიიღეს ვერანაირი ინფორმაცია.

"თქვენი გადმოსახედიდან მიგაჩნიათ, რომ დაიკარგა და საქმეს დააკლდა ძალიან დიდი რაღაცა. მე ამაზე ვერ ვიტყვი, რომ რაღაც ამით გაფუჭდა," - უპასუხა კახა სირაძემ. სირაძემ დაამატა, რომ ამ ლოგიკით მთელი 51-ე სკოლისთვის და ხორავას ქუჩისთვის უნდა მოესმინათ.

სერგი კაპანაძემ დამატებით მოითხოვა განმარტება იმის შესახებ, რატომ არ დაიწყო თვალთვალი საქმეში მონაწილე ა.ს-ზე, რომელიც ერთ-ერთი მთავარი ფიგურანტია. პროკურორის განმარტებით, არასრულწლოვანთა მიყურადება რთული პროცედურულ საკითხებთანაა დაკავშირებული და ამის უფლება არ ჰქონდათ.

პროკურორის თქმით, თუ კონკრეტული პირის, მიმართ მხოლოდ ოპერატიული ინფორმაცია არსებობს, არ არის საკმარისი სატელეფონო მოსმენის განსახორციელებლად. და მტკიცებულებები ა.ს-ზე არ იძლეოდა საკმარის მონაცემებს, ამიტომ მიღებული იქნა ეს გადაწყვეტილება, რომ მომხდარიყო მისი სატელეფონო კომუნიკაციების შედეგად გადაცემული ინფორმაციის შემდგომ გამოთხოვა.

"ის რომ განსაკუთრებით მძიმე კატეგორიის დანაშაულთან გვქონდა საქმე, ცალსახად არ ნიშნავს და არ არის საკმარისი იმისათვის, რომ სასამართლომ მიიღოს გადაწყვეტილება ფარული საგამოძიებო მოქმედების ჩატარებაზე. ეს არის ერთ-ერთი გარემოება", - განაცხადა ზვიად ფხაკაძემ.