საქართველოს ფინანსთა სამინისტროს საგამოძიებო სამსახურის ინფორმაციით, კრედიტის უკანონოდ მიღების ფაქტზე სამი პირი პასუხისგებაში მისცეს.

უწყების ინფორმაციით, ორ შემთხვევაში ბრალდებულებმა კრედიტის უკანონოდ მიღების მიზნით, კომერციულ ბანკებში განაცხადის შევსებისას მიუთითეს ყალბი მონაცემები საკუთარი ფინანსური მდგომარეობის შესახებ, თითქოსდა მუშაობდნენ სხვადასხვა კომერციულ სტრუქტურაში და იღებდნენ შესაბამის ანაზღაურებას. მესამე ბრალდებულმა ბანკში ყალბი სახელფასო ცნობა წარადგინა. ბრალდებულებმა კრედიტის სახით უკანონოდ მიიღეს თანხა და ბანკის დავალიანება აღარ დაფარეს.

საქმეებზე გამოძიება გრძელდება საქართველოს სისხლის სამართლის კოდექსის 208-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 2-დან 5 წლამდე ვადით.

საგამოძიებო სამსახურის განცხადებით, საგამოძიებო სამსახურმა კრედიტის უკანონოდ მიღებასთან დაკავშირებით გამოძიება 43 საქმეზე დაიწყო.