YouTube (და ზოგადად, ინტერნეტი) ახალი ინფორმაციის მისაღებად ან სწავლის პროცესში დამატებითი მასალების მოსაძიებლად საუკეთესო რამ არის.

საქართველოს განათლების მინისტრი ალექსანდრე ჯეჯელავაც ამ აზრზეა.

გაზეთ ბათუმელებისთვის მიცემულ ინტერვიუში ის ამბობს, რომ მთავარია ბავშვს სწავლა უნდოდეს და შევა Youtube-ზე, ნახავს ცდებს და ისწავლისო:

ჩვენ გადავწყვიტეთ, იუთუბის ის არხები შეგვეკრიბა, რომლებიც იმდენად სასარგებლოა, რომ შეიძლება მართლაც სჯობს ქართულ ან კიდევ ბევრი სხვა ქვეყნის სასკოლო სისტემას.

ჩვენ ვეთანხმებით ბატონ ალექსანდრეს - იუთუბით განათლების მიღება მართლაც შესაძლებელია და თან, ბევრად უფრო საინტერესოდ, ვიდრე ჩვენს სკოლებში არსებულ (თუ არარსებულ) ლაბორატორიებში. ოღონდ ერთი პრობლემაა - სწავლას მოწყურებულმა მოსწავლემ ინგლისური უნდა იცოდეს. და თან, რაც შეიძლება მაღალ დონეზე.

ჩავთვალოთ, რომ ყველა მოსწავლემ ძალიან კარგად იცის ინგლისური, შესაბამისად, გთავაზობთ საგანმანათლებლო არხების best-of-the-best-ს.

1. KURZGESAGT – In a nutshell

ამ არხზე, ანიმაციური ვიდეოების საშუალებითა და აუდიო-ნარატივით, თქვენ გაიგებთ ყველაფერს, რაც გაინტერესებთ ევოლუციაზე, დროზე, სივრცეზე, კოსმოსზე, ენერგიაზე და სამყაროზე. ეს ერთ-ერთი ყველაზე საინტერესო და პოპულარული არხია, რომელმაც სახელი რთული თემების მარტივად ახსნით და ულამაზესი ანიმაციით გაითქვა.

2. The Backyard Scientist

"უკანა ეზოს მეცნიერი" უამრავ ექსპერიმენტს ატარებს, ასხამს დამდნარ მეტალს სხვადასხვა საგნებში, ქიმიურ შენაერთებში, საჭმელში, სასმელში, ხილში და ბოსტნეულში. იღებს ამ ყველაფერს ვიდეოზე და შედეგებს გვაჩვენებს. თუ გაინტერესებთ, რა ემართება გამდნარ და ადუღებულ ალუმინს სპრაიტში ჩასხმის დროს, ეს არხი საუკეთესო რესურსია.

3. koen2all

უამრავი ქიმიური ცდა ერთ არხზე! ბევრი მათგანი საშიშია და შეიძლება აფეთქებაც მოჰყვეს, ამიტომ, იუთუბერი ქიმიკოსი გვაფრთხილებს, რომ ეს ცდები არ გავიმეოროთ და არ გადავბუგოთ მთელი სახლი, უბანი ან სკოლა.

4. Thoisoi2 - Chemical Experiments!

ღრმა სლავური აქცენტის მქონე ქიმიკოსი გვაჩვენებს სხვადასხვა ქიმიურ ცდებსა და მათ შედეგებს. გაფრთხილება აქაც იგივეა - დაიცავით უსაფრთხოება და ნუ გაიმეორებთ იმავეს სახლის პირობებში.

5. AsapSCIENCE

AsapSCIENCE ერთერთი საუკეთესო არხია Youtube-ზე. აქ მარტივი ანიმაციის საშუალებით მოგვითხრობენ უამრავი სამეცნიერო ფაქტის, ექსპერიმენტის, ახალი აღმოჩენებისა და კვლევების შესახებ. დაწყებული ფიზიკიდან, დამთავრებული - ბიოლოგიამდე.

6. Reactions

აშშ-ს ქიმიის ასოციაციის არხი, რომელზეც განთავსებულია უამრავი ქიმიური რეაქციის ვიდეო. არხის ერთ-ერთი ყველაზე სასარგებლო მხარე იმაში მდგომარეობს, რომ გარდა რეაქციების ვიზუალური დემონსტრაციისა, დეტალურად არის ახსნილი მისი მიზეზები და მექანიკა.

7. Smarter Every Day

ექსპერიმენტებით დახუნძლული ერთ-ერთი უძველესი არხი. მისი წამყვანი ხანდახან უაზრო რისკებზეც მიდის. მაგალითად, ამ ვიდეოში, მას აინტერესებს რა მოხდება, თუ ვერტმფრენს ძრავა გაეთიშება, რა სისწრაფით და ტრაექტორიით წამოვა ის მიწისკენ და გადარჩენის რა შანსები აქვთ მგზავრებს.

8. Crash Course

ამ არხზე ადვილი ენითაა ახსნილი ასტრონომია, ანატომია, ფილოსოფია, აშშ-ს სახელმწიფო მოწყობა, პოლიტიკა და ეკონომიკა. ვიდეოები საკმაოდ გრძელია და ინგლისური ენის ცოდნაც მაღალ დონეზეა საჭირო, მაგრამ ერთ-ერთი საუკეთესო რესურსია დიდ თემებში სწრაფად გასარკვევად.

9. Minute Physics

გაინტერესებთ, საიდან ჩნდებიან გალაქტიკები? რა არის გრავიტაციული ტალღები? რატომ არის თვითმფრინავის ძრავები დიდი ზომის? დედამიწის გამჭოლ გვირაბში ჩავარდნისას (თუ მას გათხრით), სადამდე იფრენთ და სხვა მსგავსი საკითხები? მაშინ უყურეთ ამ არხს და ისწავლეთ ფიზიკა ისე, როგორც არცერთ სახელმძღვანელოში არ არის ახსნილი!

10. Sixty Symbols

არხის აღწერაში წერია: "ძალიან მაგარი ვიდეოები ასტრონომიასა და ფიზიკაზე". უყურეთ ამ ვიდეოებს, ლექციებს და გაიგეთ რა ჯანდაბა ხდება შავ ხვრელებში, რა არის ბნელი ენერგია და კიდევ უამრავი რამ.

ეს სია არასრულია, იუთუბზე ბევრი ვიდეოა, რომლითაც ზღვა ინფორმაციის მიღება შეიძლება. პროფესიულ კურსებზე და ინტერნეტ-აკადემიებზე კი საერთოდ ცალკე სტატიის მომზადება შეიძლება.

მოკლედ, დაუჯერეთ განათლების მინისტრს და ჩაუჯექით იუთუბს. ოღონდ, მანამდე ინგლისური ისწავლეთ - ისედაც გამოგადგებათ.