აშშ-ის სახელმწიფო უსაფრთხოების სამსახურის უფროსი და მომავალი სახელმწიფო მდივანი, მაიკ პომპეო ფხენიანში ჩრდილოეთ კორეის ლიდერს, კიმ ჩენ ინს საიდუმლოდ შეხვდა. ამის შესახებ ინფორმაცია ამერიკულმა მედიამ გაავრცელა და შემდგომში პრეზიდენტმა, დონალდ ტრამპმა დაადასტურა.

"მაიკ პომპეო ჩრდილოეთ კორეაში კიმ ჩენ ინს წინა კვირას შეხვდა. შეხვედრამ კარგად ჩაიარა და კარგი ურთიერთობა ჩამოყალიბდა. სამიტის დეტალები ახლა ირკვევა. დენუკლეარიზაცია მთელი მსოფლიოსთვის სასიკეთო იქნება, მაგრამ ამავე დროს ჩრდილოეთ კორეისთვისაც", - წერს ტრამპი ტვიტერზე.

პომპეო ჩრდილოეთ კორეაში აშშ-ის პრეზიდენტსა და ჩრდილოეთ კორეის ლიდერს შორის პირდაპირი დიალოგისთვის მოსამზადებლად გაემგზავრა.

მანამდე, პრეზიდენტმა, დონალდ ტრამპმა განაცხადა, ჩრდილოეთ კორეასთან მოლაპარაკებები "საკმაოდ მაღალ დონეზე" მიმდინარეობს და დაამატა, რომ კიმ ჩენ ინთან შეხვედრისთვის ხუთ სავარაუდო ადგილს განიხილავს.

ვაშინგტონსა და ფხენიანს შორის მაღალ დონეზე კონტაქტი 2000 წლიდან არ ყოფილა. მაშინ ჩრდილოეთ კორეის ლიდერს, კიმ ჩენ ინს მაშინდელი სახელმწიფო მდივანი მადლენ ოლბრაიტი შეხვდა.

რამდენიმე კვირის წინ დონალდ ტრამპმა მოულოდნელად განაცხადა, რომ მოლაპარაკებების შესახებ ფხენიანის შემოთავაზება მიიღო და კიმ ჩენ ინთან შესახვედრად მზად არის. აქამდე აშშ-ის არც ერთი პრეზიდენტი ჩრდილოეთ კორეის ლიდერს არ შეხვედრია.

ტრამპმა ჟურნალისტებს, ასევე, უთხრა, რომ სამიტი შესაძლოა, ივნისის დასაწყისში ან უფრო ადრეც გაიმართოს.

ბირთვული იარაღის გამოცდისა და ეკონომიკური სანქციების შემდეგ ჩრდილოეთ კორეამ გარე სამყაროსთან "დაახლოება" დაიწყო. ზამთრის ოლიმპიადაზე, რომელიც სამხრეთ კორეაში ჩატარდა, ნახევარკუნძული საერთო დროშის ქვეშ ასპარეზობდა. ოლიმპიადას ჩრდილოეთ კორეა ოფიციალური დელეგაციით ეწვია, რომელსაც კიმ ჩენ ინის და ხელმძღვანელობდა.

მარტის დასაწყისში ცნობილი გახდა, რომ ჩრდილოეთ კორეა ბირთვულ იარაღზე უარის თქმისთვის მზადაა. 2011 წლის შემდეგ კიმ ჩენ ინმა ჩინეთში პირველი საერთაშორისო ვიზიტი მარტის ბოლოს განახორციელა. ფხენიანის ლიდერი ჩინეთის პრეზიდენტ სი ძინპინს შეხვდა.

უკვე ცნობილია, რომ 27 აპრილს კიმ ჩენ ინი და სამხრეთ კორეის პრეზიდენტი, მუნ ჯეი ენი ერთმანეთს შეხვდებიან.