ჩრდილოეთ კორეის ლიდერმა, კიმ ჩენ ინმა აშშ-ის პრეზიდენტ დონალდ ტრამპს საერთო შეხვედრის ჩატარება შესთავაზა, რასაც ტრამპი დათანხმდა.

ამის შესახებ ვაშინგტონში სამხრეთ კორეის წარმომადგენლებმა განაცხადეს. აშშ-ის პრეზიდენტს კიმ ჩენ ინის შემოთავაზება სწორედ მათ გადასცეს.

ჩრდილოეთ კორეის ლიდერთან შეხვედრასა და ბირთვული იაღარის გამოცდის შეწყვეტას დონალდ ტრამპი ტვიტერზეც გამოემხუარა.

ამ კვირის დასაწყისში სამხრეთ კორეის დელეგაცია ფხენიანში კიმ ჩენ ინს შეხვდა. როგორც დელეგაციის წარმომადგენლებმა განაცხადეს, ჩრდილოეთ კორეა მზადაა, შეწყვიტოს ბირთვული იარაღის გამოცდა და განიარაღება დაიწყოს, თუ ვაშინგტონი ფხენიანის უსაფრთხოებას უზრუნველყოფს.

ჩრდილოეთ კორეა ბოლო ათწლეულების განმავლობაში მსოფლიოსგან იზოლაციაში იმყოფება. ამის მიზეზი ქვეყანაში ადამიანის უფლებების მუდმივი შელახვა და ბირთვული იარაღის შექმნის მცდელობაა.

ამ დრომდე აშშ-ის არც ერთ ლიდერს ჩრდილოეთ კორეის არც ერთ ლიდერთან მოლაპარაკებები არ გაუმართავს.