ჩრდილოეთ კორეის ლიდერი, კიმ ჩენ ინი და სამხრეთ კორეის პრეზიდენტი, მუნ ჯეი ენი ერთმანეთს 27 აპრილს შეხვდებიან. ინფორმაციას The Guardian ავრცელებს.

შეხვედრა დაუსახლებელ ქალაქ პანმუნჯომში გაიმართება, რომელიც ჩრდილოეთ და სამხრეთ კორეის საზღვარზე მდებარეობს.

2011 წლის შემდეგ კიმ ჩენ ინმა ჩინეთში პირველი საერთაშორისო ვიზიტი განახორციელა. ფხენიანის ლიდერი ჩინეთის პრეზიდენტ სი ძინპინს შეხვდა. ვიზიტისას ჩრდილოეთ კორეის ლიდერმა აღნიშნა, რომ კორეის ნახევრაკუნძულზე მდგომარეობა უკეთესობისკენ მიდის და საჭიროების შემთხვევაში ბირთვულ იარაღზე უარს იტყვიან.

ბირთვული იარაღის გამოცდისა და ეკონომიკური სანქციების შემდეგ ჩრდილოეთ კორეამ გარე სამყაროსთან "დაახლოება" დაიწყო. ზამთრის ოლიმპიადაზე, რომელიც სამხრეთ კორეაში ჩატარდა, ნახევარკუნძული საერთო დროშის ქვეშ ასპარეზობდა. ოლიმპიადას ჩრდილოეთ კორეა ოფიციალური დელეგაციით ეწვია, რომელსაც კიმ ჩენ ინის და ხელმძღვანელობდა.

მარტის დასაწყისში ცნობილი გახდა, რომ ჩრდილოეთ კორეა ბირთვულ იარაღზე უარის თქმისთვის მზადაა. ბევრს საუბრობენ კიმ ჩენ ინისა და აშშ-ის პრეზიდენტის, დონალდ ტრამპის სამომავლო შეხვედრაზე, რომელსაც დონალდ ტრამპი უკვე დათანხმდა.

კიმ ჩენ ინი ჩინეთში სინ ძინპინთან შეხვედრისას

ფოტო: Reuters