ცენტრალური სადაზვერვო სააგენტოს ხელმძღვანელი და მომავალი სახელმწიფო მდივანი, მაიკ პომპეო საიდუმლო ვიზიტით ფხენიანში იყო, სადაც კიმ ჩენ ინს შეხვდა. ამის შესახებ ინფორმაციას ამერიკული მედია წყაროებზე დაყრდნობით ავრცელებს.

მათი თქმით, პომპეო ჩრდილოეთ კორეაში აშშ-ის პრეზიდენტსა და ჩრდილოეთ კორეის ლიდერს შორის პირდაპირი დიალოგისთვის მოსამზადებლად 31 მარტს ან პირველ აპრილს გაემგზავრა.

მანამდე, პრეზიდენტმა, დონალდ ტრამპმა განაცხადა, ჩრდილოეთ კორეასთან მოლაპარაკებები "საკმაოდ მაღალ დონეზე" მიმდინარეობს და დაამატა, რომ კიმ ჩენ ინთან შეხვედრისთვის ხუთ სავარაუდო ადგილს განიხილავს.

ფხენიანში მაიკ პომპეოს გამგზავრების შესახებ ინფორმაცია პირველად The Washington Post-მა გაავრცელა. გამოცემის ინფორმაციით, ვიზიტი მალევე განხორციელდა მას შემდეგ, რაც მაიკ პომპეო მომავალ სახელმწიფო მდივნად დასახელდა.

ვაშინგტონსა და ფხენიანს შორის მაღალ დონეზე კონტაქტი 2000 წლიდან არ ყოფილა. მაშინ ჩრდილოეთ კორეის ლიდერს, კიმ ჩენ ინს მაშინდელი სახელმწიფო მდივანი მადლენ ოლბრაიტი შეხვდა.

ამ ეტაპისთვის მაიკ პომპეოს საიდუმლო გამგზავრებას თეთრი სახლი და ცენტრალური სადაზვერვო სააგენტო არ ადასტურებენ.

რამდენიმე კვირის წინ დონალდ ტრამპმა მოულოდნელად განაცხადა, რომ მოლაპარაკებების შესახებ ფხენიანის შემოთავაზება მიიღო და კიმ ჩენ ინთან შესახვედრად მზად არის. აქამდე აშშ-ის არც ერთი პრეზიდენტი ჩრდილოეთ კორეის ლიდერს არ შეხვედრია.

ტრამპმა ჟურნალისტებს, ასევე, უთხრა, რომ სამიტი შესაძლოა, ივნისის დასაწყისში ან უფრო ადრეც გაიმართოს.

ბირთვული იარაღის გამოცდისა და ეკონომიკური სანქციების შემდეგ ჩრდილოეთ კორეამ გარე სამყაროსთან "დაახლოება" დაიწყო. ზამთრის ოლიმპიადაზე, რომელიც სამხრეთ კორეაში ჩატარდა, ნახევარკუნძული საერთო დროშის ქვეშ ასპარეზობდა. ოლიმპიადას ჩრდილოეთ კორეა ოფიციალური დელეგაციით ეწვია, რომელსაც კიმ ჩენ ინის და ხელმძღვანელობდა.

მარტის დასაწყისში ცნობილი გახდა, რომ ჩრდილოეთ კორეა ბირთვულ იარაღზე უარის თქმისთვის მზადაა. 2011 წლის შემდეგ კიმ ჩენ ინმა ჩინეთში პირველი საერთაშორისო ვიზიტი მარტის ბოლოს განახორციელა. ფხენიანის ლიდერი ჩინეთის პრეზიდენტ სი ძინპინს შეხვდა.

უკვე ცნობილია, რომ 27 აპრილს კიმ ჩენ ინი და სამხრეთ კორეის პრეზიდენტი, მუნ ჯეი ენი ერთმანეთს შეხვდებიან.