სომხეთში ოპოზიციური მოძრაობის ლიდერმა, ნიკოლ პაშინიანმა განაცხადა, რომ ქვეყანაში "რევოლუციური სიტუაციაა" და "არაძალადობრივი ხავერდოვანი რევოლუცია" იწყება. ინფორმაციას რადიო თავისუფლების ადგილობრივი ბიურო ავრცელებს.

რამდენიმე დღეა სამოქალაქო დაუმორჩილებლობის აქციის მონაწილეები ერევნის ქუჩებში ყოფილი პრეზიდენტის, სერჟ სარგსიანის პრემიერ-მინისტრობის კანდიდატურას აპროტესტებენ. მათ რამდენჯერმე გადაკეტეს ცენტრალური ქუჩები.

ამ დროისთვის პარლამენტში სერჟ სარგსიანს გამოსვლას უსმენენ, პარალელურად, ქუჩაში კი საპროტესტო აქცია მიმდინარეობს.

დემონსტრანტებმა გენერალური პროკურატურა, ცენტრალური ბანკი, საკასაციო სასამართლო, სახელმწიფო შემოსავლების კომიტეტი, მთავრობის ახალი კორპუსის შესასვლელები გადაკეტეს.

გუშინ, 16 აპრილს პოლიციამ პარლამენტის შენობასთან არ მიუშვა აქციის მონაწილეები, რასაც დაპირისპირება მოჰყვა და 40-ზე მეტი ადამიანი დაშავდა, მათ შორის, პოლიციელები.

სერჟ სარგსიანს პრეზიდენტის პოსტზე უფლებამოსილების ვადა 9 აპრილს ამოეწურა. 9 აპრილსვე სომხეთის ახალი პრეზიდენტის, არმენ სარგსიანის ინაუგურაცია გაიმართა. 17 აპრილს სომხეთის პარლამენტი პრემიერ-მინისტრს აირჩევს.

სომხეთის ეროვნულმა კრებამ ქვეყნის პრეზიდენტად არმენ სარგსიანის არჩევას მხარი 2 მარტს დაუჭირა.

საკონსტიტუციო ცვლილების მიხედვით, სომხეთი საპარლამენტო მმართველობაზე გადადის და ქვეყნის პირველი პირი პრემიერ-მინისტრი იქნება.