იუსტიციის უმაღლეს საბჭოში მიმდინარე კენჭისყრის შედეგად 36 მოსამართლე უკვე აირჩიეს, რომელთა შორისაც თამარ ალანია და მერაბ ბაბინაშვილიც მოხვდნენ. ამასთან, საბჭომ რუსთავი 2-ის საქმის მოსამართლე, თამაზ ურთმელიძე და გირგვლიანის საქმის მოსამართლე, გიორგი ჩემია არ აირჩია.

იუსტიციის უმაღლეს საბჭოში მოსამართლეთა ასარჩევად კენჭისყრა დილიდან მიმდინარეობდა. აღსანიშნავია, რომ თავდაპირველად კონკურსში 125 მოსამართლე იღებდა მონაწილეობას, თუმცა 3-მა მათგანმა კანდიდატურა მოხსნა. აღნიშნული კენჭისყრის შედეგად სულ 65 მოსამართლე უნდა აარჩიონ.

დღევანდელ კენჭისყრამდე რამდენიმე დღით ადრე არასამთავრობო სექტორი მოსამართლეების გასაუბრების ეტაპის ხარვეზებით წარმართვაზე აქტიურად საუბრობდა და მათი მიერ გასაუბრებაზე დასმულ შეკითხვებზე გაცემულ პასუხებზე აპელირებდა.

ერთ-ერთი კანდიდატმა გასაუბრების ეტაპზე განაცხადა, რომ მისთვის მოსამართლეობისთვის მთავარი მოტივატორი ხელფასი იყო. სწორედ აღნიშნულთან დაკავშირებით დღეს ჟურნალისტებთან საუბარში იუსტიციის უმაღლესი საბჭოს მდივნმა, ლევან მურუსიძემ აღნიშნა, რომ სამსახურის არჩევისათვის შესაძლოა ადამიანისთვის გადამწყვეტი მნიშვნელობა სწორედ ხელფასს ენიჭებოდეს:

"თქვენი აზრით, კონკურსანტი გულწრფელი იქნებოდა, რომ ეთქვა, რომ უხელფასოდ ვიმუშავებ მოსამართლის თანამდებობაზე იმდენად პრესტიჟულია ჩემთვის და ბავშვობიდან ვოცნებობდი, რომ ხელფასის გარეშეც თანახმა ვარ ვიმუშაო. ეს პასუხი იქნებოდა გულწფრელი?".

არჩეულ მოსამართლეებს შორის არიან: თამარ ალანია - საბჭოს წევრი, რომელიც თბილისის სააპელაციო სასამართლოს სამოქალაქო პალატაში 10 ხმით დანიშნეს და მერაბ გაბინაშვილი, რომელიც ამავე სასამართლოს საგამოძიებო კოლეგიაში 12 ხმით დანიშნეს.

დღესვე საბჭომ დავით მამისეიშვილი ბათუმის საქალაქო სასამართლოს სამოქალაქო პალატაში 11 ხმით აირჩია, ეკა გაბრიჩიძე კი, რომელიც მაგდა პაპიძის საქმის მოსამართლეა, თბილისის საქალაქო სასამართლოს სისხლის სამართლის კოლეგიაში აირჩიეს.

იუსტიციის უმაღლესი საბჭოს კენჭისყრის პარალელურად ადვოკატთა ასოციაციის ორგანიზებით აქცია გაიმართა, რომლის მონაწილეების თამაზ ურთმელიძის, ჯემალ კოპალიანის, მამია ფხაკაძის, გიორგი ჩემიას, მერაბ გაბინაშვილისა და თამარ ალანიას დანიშვნას აპროტესტებდნენ.