საქართველოს პარლამენტში დეპუტატების ეთიკის კოდექსზე მსჯელობენ. კანონპროექტის მიხედვით, განისაზღვრება დეპუტატების ქცევის ნორმები და შეიქმნება ეთიკის საბჭო, რომელიც საჩივრებს განიხილავს. ეთიკის კოდექსის ნორმების დარღვევისთვის სანქციების მექანიზმის ამოქმედება იგეგმება.

პარლამენტის წევრის ეთიკის კოდექსის დარღვევის შემთხვევაში პასუხისმგებლობის ზომა შეიძლება იყოს:

  • სარეკომენდაციო გაფრთხილება
  • ხელფასის დაკავება (ხელფასის 10-50 პროცენტის ოდენობით)
  • საპარლამენტო ოფიციალურ ვიზიტებში მონაწილეობის შეჩერება (მაქსიმუმ ექვსი თვის განმავლობაში).

"ერთი დარღვევისათვის შეიძლება გამოყენებულ იქნეს პასუხისმგებლობის მხოლოდ ერთი ზომა. გამოყენებული პასუხისმგებლობის ზომა უნდა იყოს დარღვევის თანაზომიერი", - წერია ეთიკის კოდექსში.

კანონპროექტი პარლამენტში პირველი მოსმენით უკვე განიხილეს, თუმცა კენჭისყრა გადაიდო.

პლენარულ სხდომაზე ქართული ოცნების დეპუტატების ნაწილმა ეთიკის კოდექსის კონკრეტული მუხლები გააკრიტიკა. მთავარი საკითხები, რომელზეც უმრავლესობაში ვერ შეთანხმდნენ, დისკრიმინაციულ და სექსისტურ გამონათქვამებს, სანქციებისა და ეთიკის საბჭოს შემქნის ნაწილს უკავშირდებოდა.

ქართული ოცნების დეპუტატი ენძელა მაჭავარიანი ფიქრობს, რომ დეპუტატებს არ სჭირდებათ მსგავსი დოკუმენტი და სანქციების დაწესება დეპუტატებისთვის არაეთიკურია.

კანონპროექტზე შენიშვნები აქვს ამავე პარტიის დეპუტატ გიგა ბუკიას. მისთვის გაუგებარია რას ნიშნავს ჩანაწერი დისკრიმინაციული და რა შემთხვევაში არ ჩაითვლება მისი განცხადება სექსისტურად.

უმრავლესობის დეპუტატების ნაწილმა კანონპროექტის კენჭისყრაზე უარი განაცხადა და არსებული ვერსიის უკან, საკომიტეტო განხილვებზე დაბრუნება მოითხოვა.

გაიგე მეტი: რა ეთიკურ ნორმებს უნდა იცავდეს დეპუტატი - კანონპროექტი მოკლედ